Misyon sa Asia

Atol sa kapistahan sa Patron sa Metro Xavier Community niadtong December 3, 2022, gisugdan ang Santos nga Misa sa alas ocho biente sa kabuntagon didto sa St. Francis Xavier Regional Major Seminary Chapel nga gipanguluhan ni Most. Rev. Jose Colin Bagaforo, D.D., Obispo sa Dayosis sa Kidapawan, kauban ang mga formators sa REMASE, XACOSE, SDV, Propaedeutic Year, ug mga bisitang Pari, gipaambit ang dakong kontribusyon ni San Francisco sa pagpakaylap sa Kristianismo sa Asya.

Sa iyang homiliya gipaambit ni Bishop Colin ang dakong kalambigitan ni San Francisco Javier sa pagpakaylap sa Ebanghelyo pinaagi sa iyang misyon sa Asia. Matod pa niya, si San Francisco Javier sa iyang dekadang misyon mibyahe gikan sa iyang lugar sa Espanya padulong sa Goa, Malaysia, Malacca, Indonesia, Pilipinas ug Japan. Naay mga nahasulat nga nagpamatuod nga si San Francisco Javier milatas sa Pilipinas. Sa napulo ka tuig niyang pagbyahe sa pagsangyaw sa Ebanghelyo siya giniyahan ug anaay kaikag tungod kay matud pa niya anaay “urgency” sa pagsangyaw sa Ebanghelyo. Gipahinumdoman ni Bishop Colin ang mga seminarista sa hagit nga mamahimong misyonero susama ni San Francisco Javier nga ipahibalo ang istorya ni Kristo sa katawhan nga walay kahadlok ug puno sa kadasig ug kaisog.

Ang maong kasaulogan giapilan sa mga seminarista, Sacred Hearts Brothers, kamadrehan, ug mga bisita nga nakigduyog sa selebrasyon sa tibook Metro Xavier Community. Paghuman sa Misa, gipagaambitan sa matag community ang ilang giandam nga mga pagkaon alang sa mga bisita. Sa hapon anaay gipahigayong mga kalingawan sama sa basketball ug volleyball sa SFX-REMASE Dennis Uy Gymn nga gi-apilan sa mga kaparian sa Davao ug Tagum, ug mga dula sa mga seminarista batok sa San Pedro College Toril. (Sem. Ronel A. Antonio, CY5)