Katikaran sa Ika-44 Kapistahan sa Cabonbon

Sa Liturhikanhong Kalendaryo sa Simbahang Katoliko, ang Desyembre 8 usa ka talagsaon ug importante nga adlaw isip kapistahan sa Mahal nga Patron ang IMMACULADA CONCEPTION. Duyog sa tibuok simbahan nagsaulog sab ang GKK Imaculada Conception sa Cabonbon sa ilang ika-44 nga kapistahan uban sa tema: “SANTA MARIA, GIPANAMKON NGA WALAY BULING SA SALA, SUMBANAN SA TIUNAY NGA PAGKAPINIYALAN UG INAHAN SIMBAHAN.”

Sulod sa alas dyes nga pista nga gipangulohan ni Fr. Arnold Balaquinto, kura paroko sa San Roque Parish Malabog, naghatag sab siya sa gamayng katesismo bahin sa solemne nga selebrasyon sa kapistahan sa pagpanamkon kang Birhen Maria, nga kini adlaw sa obligsayon sa tanang mga Katoliko ug nga ang tanan gi-awhag nga musimba. Sulod sa Santos nga Misa gihimo usab ang panalangin o Act of Consecration sa putling kasingkasing ni Maria.

Human sa misa naghatag ug mga pulong pasalamat ang PSK nga si Mr. Dominador Juaton ug matod pa niya, “kooperasyon ug paghatag og respeto bilang PSK maoy susi nga naghatag ug nag-abli sa matag usa kanato aron ang atong mga tumong og tinguha atong makab-ot.”

Human sa Santos nga Misa adunay 10 ka bata ang nakadawat sa Sakramento sa Bunyag dayon misunod ang paniudto ug mga programa nga gihimo sa Cabonbon Gym sama sa Little Miss ICC nga gilangkuban sa 9 ka mga bata nga nagpadayag sa 9 ka titulo ni Santa Maria. Ang Cabonbon Elementary School ubos sa pagpanguna ni Mrs.Rosita Q.Largo adunay giandam nga mga pasundayag.

Paghuman sa programa duna sab basketball game sa mga GSL’S og staff sa San Roque Parish kauban ni Fr. Arnold diin sila ang nahimong mananaog.

Sa katapusan, programa sa parokya o tawag mahitungod sa debosyon ni Santa Maria nga babagan, pakgangon, undangon ang tanang klase sa sugal, ipalapnag, pakusgan ang tanang klase sa pag-ampo ilabina ang pagrosaryo.

Puno sa kadasig…Puno sa kalipay…Puno sa Pagpasalamat…Puno sa Gugma…

VIVA!!!SANTA MARIA

(Noralyn Largo | GKK ICC Cabonbon)