Badlungon Gyud Ko

Dear Ate Emz,

Glory and praise to God!

Tugoti ako nga mapaambit ang akong kasinatian sa kinabuhi uban ang paglaum nga hinaut unta nga ang uban makakat-on sama sa akong nakat-unan.

Maka-ingon ako sa akong kaugalingon nga ako lamang gi sayang-sayangan ang mga panahon. Kaniadto nga buhi pa ang akong mga ginikanan, kunsimisyon ang ilang gidangatan nganhi kanako. Badlungon ako sa pagkatinood lang. Wala akoy kalooy kanila sa mga panahon nga ako nagdako. Sayod man kita nga unsang klaseng mga pagdisiplina kaniadto, pisikal gayud apan wala ako dutli ug nausab. Samot pa hinoon ako nagpabadlong. Akoa man gud huna-huna kaniadto nga puro lang kabuang. Diay to sobra-sobra na ang ilang pag-antus kanako. Aduna pa’y higayon nga akoa silang gitunglo sa akong ka pungot.

Pagka walay batasan nako. Ang akong pagmahay dili masukod. Nabag-o lamang kini nga nagkasakit na ang akong amahan dala na sab sa iyang pangidaron. Napugos ako pagbag-o aron mupuli sa iyang katungdanan. Pangita ug panginabuhi-an aron maka sustinir sa pang-adlaw adlaw. Dako akong pagmahay kay usa sa mga rason sa iyang pagkasakit kining akong batasan. Dili pa man hinoon ulahi ang tanan ug ako na kining gibasulan. Dili gayud angayan nga makapasakit labaw na ang atong mga ginikanan.

Life is short, yes, tinood, mao nga atong puy-an sa husto ug matarong ang mga higayon aron dili kini sayo nga kuhaon.

Nagmahay,
Tolits

* * * * * *

Dear Tolits,

Tinguha sa matag ginikanan nga ang ilang mga anak modako nga maayong tawo. Ug dili lalim ang magpadaku ug mag-amuma sa mga anak. Ang pagpaningkamot sa mga ginikanan nga matul-id ang pamatasan sa mga anak, nagkinahanglan gyud ug walay puas nga pailob ug paglahutay aron makab-ot kini.

Bulahan ka nga aduna kay mga ginikanan nga naggiya kanimo sa hustong dalan dinha sa imong pagtubo. Nagtuo ako nga pinaagi sa ilang pasensya ug pag-ampo naamgohan nimo kung unsa ang mga kasakit nga ilang naagihan tungod sa imong mga pagpabadlong kanila samtang ikaw nagdako.

Ang tanang panghitabo sa atong kinabuhi, naay rason. Usahay, sa atong paglawig aning kalibutan, mapandol gyud kita sa makadaghang higayon. Kining pagkapandol, matud pa sa imong kasinatian, nakahatag og dakung kunsimisyon sa imong ginikanan, busa, nakasulti ka nga “sobra-sobra gyud ang ilang pag-antus” dinha kanimo labi na sa higayon nga imo na silang gitunglo.

Ang Ginoo, sa Iyang kaugalingong panahon, sa Iyang kaugalingong pamaagi, Iyang himuon ang mga butang nga mahitabo aron ipaabot ang Iyang mensahe ug ang Iyang mga plano alang kanato. Mao nga sa higayon nga nagsakit ang imong amahan, dinha ka nakaamgo kung unsang mga kasakit ug sakripisyo ang naagian sa imong mga ginikanan, tungod, matud pa nimo, sa imong pagka “walay batasan” niadtong panahon sa imong pagkabatan-on. Kini nga higayon sa pagkaamgo, sa tinuod lang, grasya ug panalangin kini gikan sa atong Ginoo nga nagdala kanimo sa pagbag-o sa kasing-kasing. Tungod niini, makaingon kita nga bisan unsa pa ka daotan ang nabuhat sa usa ka indibidwal kaniadto sa iyang kinabuhi, aduna gyud something good sa kinauyukan sa iyang pagkatawo.

Sa imong kabahin, Tolits, ang mahinungdanon mao nga nagbasol ka ug nagmahay sa imong nabuhat kaniadto. Nagbag-o ka pinaagi sa pag-ako sa responsibilidad sa pagpatunhay sa pamilya. Dili pa ulahi ang tanan sa pagbag-o sa imong kaugalingon. Ang pagserbisyo sa imong mga ginikanan sa pagsalop sa mga tuig sa ilang kinabuhi usa ka bililhong gasa. Kini tungod nadungog ug nakita pa nila ang imong mga pagpakita sa imong gugma ug pagbasol pinaagi sa imong mga pulong ug mga buhat.

Indeed, sometimes God writes straight with crooked lines. Gitugutan Niya kita nga makasinati og mga likoanan sa kinabuhi aron sa pagtudlo kanato sa mga leksyon, sa paglig-on kanato ug sa pagtul-id sa atong dalan pagabot sa saktong panahon. Sa imong pagtan-aw balik sa imong mga “crooked lines and detours” sa kinabuhi, natul-id kini sa dihang imong nakat-unan nga “dili gayud angayan nga makapasakit labaw na sa ang atong mga ginikanan”. Atong hinumdoman nga ang mga ginikanan maoy mga representante sa Ginoo dinhi sa kalibutan. Bisag unsa pa ang ilang mga kakulangan o pagka imperfect, takos gihapon sila sa atong gugma ug pagrespeto tungod kini nagsaad ug taas nga kinabuhi. Dugang pa niini, ang pagpasidungog ug pagtahud sa mga ginikanan usa ka timailhan sa pagpasalamat alang kanila, kinsa, pinaagi sa gasa sa kinabuhi, ilang gugma ug ilang buhat, nagdala kanato niining kalibutana ug nakapahimo kanato sa pagtubo sa gidak-on, kaalam ug grasya. Labaw sa tanan, hinumdumi kanunay ang pag-ampo alang sa walay katapusan nga kapahulayan sa ilang mga kalag, ug pag-ampo sab sa maayong panglawas ug kaayohan sa imong tibuok pamilya.

Salamat sa pagpa-ambit sa imong kasinatian sa kinabuhi. Tinuod, ang kinabuhi mubo ra ug walay kasiguruhan kung hangtud asa lang kutob kini. Hunahunaa ang oras o ang panahon. Mao ra ni ang dili na nato makuha o mabawi sa higayon nga molabay na kini.

In this season of advent, while waiting in joyful anticipation for the birth of our Savior, may this be an opportunity for you to ponder on what’s the best gift you can give to Jesus as a gesture of welcoming him into your renewed life.

God bless you more,
Ate Emz