Angay nang mamahimong Parokya

Nagsaulog sa ilang ika-limang pyesta ang Christ the King community sa Kauswagan, Panabo City niadtong Nobyembre 20, adlawng Dominggo. Ang maong selebrasyon gipangunahan sa ilang priest in-charge nga si Rev. Fr. Dioscoro Saniel, ug gisuportahan sa mga parokyano gikan sa mga Barangay sa Kauswagan, Fatima, Cacao, Kasilak, Water Fall, Consolacion, ug Malatibas.

Nagsugod ang selebrasyon sa Santos nga Misa dinha sa covered court sa Brgy. Kauswagan nga gipangulohan ni Most. Romulo G. Valles, DD, Arsobispo sa Davao, uban nila Rev. Fr. Mervin Maglana, kura paroko sa Parokya sa San Miguel, Panacan duyog sa iyang resident priest nga si Rev. Fr. Pedro Maniwang, Rev. Fr. Anthony Silvosa, kura paroko sa sa Virgen De Los Remedios, Toril, ug Rev. Fr. Dioscoro Saniel, priest in-charge sa maong katilingban.

Atol sa homiliya, si Arsobispo Valles mipadayag sa iyang kalipay ug pagpasalamat sa katilingban tungod sa hingpit nga suporta nga ilang gihatag sa Simbahan, ilabina sa ilang katilingban. Matod pa niya nga andam na ang kapilya sa Kristo nga Hari nga ituboy ug himoong Parokya. Giawhag usab sa arsobispo ang komunidad nga motabang sa pagtukod sa Simbahan sama kadako sa covered court. Ug sa wala pa ang kataposang panalangin, ang arsobispo padayong nagpasalamat sa mga barangay ug eskwelahan nga mitabang aron mamahimong posible ang kasaulogan. Matod niya, “Natandug ko..maayo sa simbahan na matag karon og unya nga modawat nga mapaubsanon, mapasalamaton kay daghan mga higayun susama karon na we are the receiving end of your kindness and cooperation. Humbled ang simbahan kay kanunay nag distorbo, naghangyo, og naghatag sa inyong resources…Daghan salamat kay naka dawat kami sa inyong kaluoy og hinabang.” Sa dihang natandog siya, gidayeg niya ang katilingban tungod kay daghang batan-on, ug mga bata ang mitambong sa misa. Kumbinsido ang arsobispo nga dunay kaugmaon ang Simbahang Katoliko sa Kauswagan tungod sa presensiya sa mga batan-on.

Human sa misa, nagpadayon ang selebrasyon diin nagtapok gihapon ang komunidad sa gymnasium samtang nag-andam sa ilang mga lingkuranan, lamesa, ug pagkaon alang sa salo-salo.

Ang Solemnidad ni Kristo nga Hari, ilabina sa Kauswagan Community, nagpahinumdom kanato nga ang Simbahan hingpit nga buhi ug aktibo sa kinabuhi sa matag matuohon. Usab, kini nagpahinumdom kanato nga ang sibil nga estado ug ang simbahan mahimong magtinabangay alang sa kahimayaan sa Dios. Ang Kristo nga Hari nga Komunidad sa Kasuswagan nagpakita sa Hari nga katungdanan ni Kristo, nga si Kristo naghari sa ilang kinabuhi sa pamaagi sa paghigugma ug pagpangalagad. (Bro. Angelo Espinas)