MSPC: Pagkinabuhi Isip Sinodal nga Simbahan

Ang 17th Mindanao Sulu Pastoral conference gipahigayon sa Chali Beach Resort sa Cagayan de Oro City niadtong Nobyembre 7-11, 2022, ug gipasiugdahan sa Arkidayosis sa Cagayan. Ang mga delegado gikan sa Mindanao Dioceses sa DaDiTaMa, CaBuSTaM, KidMaCo, Dopim, ug ZamBaSulI mitambong sa dakong kalihokan. ANG GASA SA PAGTUO UG EBANGELISASYON ISIP SYNODAL CHURCH maoy nagsilbing tema niini nga kalihokan. Ang mga keynote speaker sa maong kalihokan mao sila Most. Rev. Angelito R. Lampon, D.D., Arsobispo sa Cotabato, Most Rev. Abel C. Apigo, D.D., Obispo sa Mati, Most Rev. Ronald I. Lunas, D.D., Obispo sa Pagadian, ug Rev. Fr. Reynaldo D. Raluto gikan sa dayosis sa Malaybalay.

Alas 5 sa hapon, sa unang adlaw sa kalihokan, si Arsobispo Jose A. Cabantan, Arsobispo sa Cagayan, maoy nangulo sa inaugural mass sa St. Augustine Cathedral. Ang mga representante gikan sa daghang mga diyosesis giabi-abi usab niadtong adlawa ni Archbishop Emeritus Antonio Ledesma.

Ang ikaduhang adlaw naglangkob sa duha ka komperensya. Ang mga presentasyon nagsentro kasagaran sa tema nga “Missionary Commitment.” Ang mga Komperensya gibahin sa sesyon sa buntag ug sesyon sa hapon.

Ang ikatulo nga adlaw sa komperensya nagsentro sa Ebanghelisasyon sa Mindanao, sinodalidad, ug espiritwalidad, pagporma sa usa ka ekolohikal nga komunidad sa Mindanao, ug pagpatuman sa usa ka integral nga ministeryo sa ekolohiya sa diwa sa Laudato si.

Ug sa ikaupat nga adlaw, adunay sub-regional reports ug adunay mga “reactor” sa maong mga report. Kini sa samang adlaw, nagsilbi nga katapusang komperensya sa kalihokan. Apan ang pormal ug katapusang adlaw sa panagtapok niadtong Biyernes, ika-5 nga adlaw, Nov. 11, 2022, human sa Santos nga Eukaristikanhon nga Pagsaulog sa buntag.

Sa iyang programa sa radyo, ang Tingog sa Magbalantay, si Most Reverend Romulo G. Valles, D.D., usa sa mga delegado sa Arkidayosis sa Davao, mipaambit sa iyang mga hunahuna sa maong kalihokan: “Ang presentasyon nagduso kanato sa paghinumdom sa atong kasaysayan, usa ka kasaysayan sa ebanghelisasyon. Kini ang bunga sa 500 ka tuig sa Kristiyanismo sa Pilipinas. Kini naghatag ug kahayag sa atong synodal nga ritmo. Kita naningkamot nga mapagaan ang resulta sa synodal meeting. Kini naghatag ug kahigayonan sa pagsud-ong sa kaugalingon…ug naghatag kahayag sa atong mga responsibilidad sa pagkapiniyalan. Unsa ka epektibo ang atong ebanghelisasyon, ug sa unsang paagi kini nakaapekto sa atong pagtuo? Sa unsang paagi kita makig-uban sa usag-usa ug sa natural nga kalibutan samtang kita nagpanaw?” (Bro. Angelo Espinas)