“Mga Pangulo sa San Roque Parish- Malabog, Abli ang Kasing-kasing sa Pagkat-on”

Niadtong Oktubre 23, 2022, adlawng Dominggo, human sa Pagsaulog sa Santos nga Misa, nahitabo ang pormasayon sa Ministriya sa PSK, PSB, SoCCom og LCM didto sa Parokya sa San Roque Parish, Malabog. Tumong sa programa nga ipadangat kanato ang tiunay nga kahulugan sa pagpangalagad, isip kabahin sa atong pagsunod kang Hesus.

Ang unang mamumulong mao si Bro. Mervin Ceballos Jr., seminarista. Usa sa iyang gitagaan ug dakong pagpasabot mao ang mahitungod sa pagsulat ug article. Kay kita piniyalan man, kita usab mopakaylap sa maayong balita. Sa higayon nga adunay manawag, dili lamang unta kita maghulat nga makadungog, apan maminaw gayud.

Ang ikaduhang mamumulong mao si Fr. Arnold Balaquinto, Kura Paroko- sa San Roque Parish- Malabog. Diin iyang gipahinumdom og gipasabot ang GKK Norms nga naglakbit sa esensiya sa matag Gagmayng Kristohanong Katilingban. Ang matag GKK gibahin sa duha ka grupo, ang GSL kon GKK Servant Leaders og Ang mga Miyembro. Ang mga GSL, mao ang manguna sa mga programa sa simbahan, og ang mga miyembro mao ang mga mosuporta niini. Kining duha ka pundok gikinahanglan nga magtinabangay, mag-inambitay og mag sinabtanay aron nga makab-ot ang ilang mga maayong tumong og tinguha. Sa kana nga paagi, mabati gayud sa tanan ang gugma sa Ginoo kanato.

Sa laing bahin, sa susamang takna gihimo usab ang pagbansay sa mga bag-o pa lamang gayud napili nga mga PSKB. Kinsa motabang sa pagpalambo hilabi na sa Espirituhanon nga aspeto sa kinabuhi sa matag pamilya diha sa mga GKK. Si Fr. Orlando Angelia, anaa na usab niadtong taknaa, migahin sa iyang oras sa paggiya og pagtudlo sa mga magtiayon diha sa ilang sa pagsabot sa ilang mga nagkadaiyang tulomanon og misyon.

Matag Ministriya sa atoang katilingban adunay tagsa-tagsa ka mga bulohaton og katungdanan. Apan usa ra gayud ang pinakatumong niini, ug kana mao ang pagpagamit isip instrumento sa pagpalapnag sa pulong sa Ginoo. Diha sa pagtubag sa atong tagsa-tagsa ka mga tawag, adunay mga panahon nga kita makasinati ug kalisdanan. Apan kung abli lamang ang atong kasing-kasing sa pagkat-on, mamahimo kitang kusgan sa paglabang niini. Atoa lamang hinudoman nga gipili kita Niya, og nga dili gayud ta Niya pasagdan.

Sa kanunay, Dalaygon ang Diyos!

(Jozeil Comapas Crodua – Youth SocCom)