Metanoia

Ikaduhang Domingo sa Adbyento (December 4, 2022)
Is 11:1-10 / Ps 72:1-2, 7-8, 12-13, 17 / Rom 15:4-9 / Mt 3:1-12

Ang kahoy maila diha sa iyang mga bunga, ingon usab niini ang pag-ila sa tawo kon unsa ang anaa sulod kaniya pinaagi sa iyang mga buhat. Si Juan nagbunyag didto sa sapa sa Jordan aron pag-andam sa katawhan sa pagsugat sa Manunubos. Ang sapa sa Jordan adunay lawom nga kalambigitan sa kinabuhi sa mga Judio nga mao ang paglaom ug bag-ong kinabuhi. Ang Dios naghimo ug mga dagkong katingalahang mga butang sama sa pag-ayo ni Naaman (2Kng 5:1-14), ang pagsaka ni Propeta Elias ngadto sa langit (2Kng 2:1-11), ug labaw sa tanan ang paglabang sa mga Israelita human sa ilang paghawa gikan sa Ehipto, aron matuman ang saad sa Dios.

Ang pagbunyag ni Juan usa ka ilhanan nga hapit na gayod maghari ang Dios, matud pa sa pagsaysay ni San Mateo “paghinulsol kamo, kay haduol na ang gingharian sa langit” kini nga kamatuoran adunay kalambigitan isip mga binunyagan ug mga sumusunod ni Kristo. Ang pulong nga paghinulsol adunay kahulogan diha sa Greyego nga mao ang pag-usab sa hunahuna o panglantaw apan diha sa kultura sa mga Judio, sa Hebreo nga pinulongan nagkahulogan kini ug pagbalik. Si Juan nag-agni kanatong tanan nga mobiya sa sala sa hunahuna og buhat ug mobalik ngadto sa Dios. Ang atong mga sala makapahimulag kanato sa Dios, apan pinaagi sa bunyag kita nahimong mga anak nga sinagop sa Dios. Gipahinumdoman kita ni Juan nga kon dili kita maghinulsol sa tinuoray, kita mahiagom sa kapungot sa Dios. Dili kita magsalig nga kita usa ka binunyagan ug ang Dios mag-ila kanato nga iyang mga anak. Nagpahinumdom si Juan sa mga Pariseo ug Saduceo “ayaw baya pagdahom og sulti sa inyong kaugalingon, ‘among amahan si Abraham.’ Kay sultihan ko kamo nga ang Dios makahimo pagpabarog og mga kaliwat ni Abraham gikan niining mga batoha.” Dili nato paaboton nga kita tawgon ug mga kaliwat sa halas.

Sa katapusan, ang atong mga buhat ug lihok makapahimoot unta sa Dios. Ang bunyag sa Balaang Espiritu dili lamang nagpadayag sa tinguha sa pagkinabuhi sa mas maayong kinabuhi; kini aktuwal nga nagbag-o sa tawo, nga mahiusa ang kalag sa kamatayon ug pagkabanhaw ni Kristo (Catechism 1227, 1262, 1265). Niining panahon sa Adbyento atong andamon ang mga kaugalingon nga kini atong lantawon diha sa mga mata sa pagtuo. Sa laktod nga pagkasulti, ang atong pagtoo makita diha sa buhat ug magtabang pagpaila sa Dios sa tanang natong gikasugat sa atong panaw. Sugdi karon ang pagbiya sa sala ug pagbalik sa atong Magbubuhat. (Bro. Soren Abellanosa)