Kadasig Sa Mga Parokyano sa Sto. Rosario

Dakong kalipay ang gibati ni Archbishop Valles sa pagkakita niya sa mga parokyano sa Sto. Rosario Toril panahon sa ika-74 nga kapistahan niadtong Oktubre 7, 2022 adlawng Byernes. Tuod man kining adlawa tingtrabaho apan ang dakong simbahan sa Toril napuno gayud sa katawhan. Dugang sa kalipay sa arsobispo ang pagkakita sa mga kabatan-onan nga maoy kadaghanan sa mga nanimba sa Pontifical Mass sa alas nwebe sa buntag. Ang choir nakadungag sa malipayon nga pagsaulog sa kapistahan tungod sa ilang maanindot nga tingog ug mga instrumento sa musika sama sa gitara ug banduria.

Sa pamalandong ni Most Rev. Romulo G. Valles, DD iyang gibutyag nga daw siya ang nadasig ug dili siya ang nagdala ug kadasig diha sa parokya. Dako ang iyang paglaom nga mas mulambo ang parokya sa umaabot tungod sa mga kabatan-onan nga duna nay mga dagkong liso sa pagtoo.