Giunsa Pag Saulog ang Adlaw sa mga Kalag?

Gisaulog niadtong Oktubre 29, 2022 sa alas 2:00 sa hapon dinhi sa San Pedro Cathedral ang gitawag nga Divine Cosplay o ang paghulagway sa mga Santo ug Santa pinaagi sa ilang mga kostumbre, kinaiya ug ang ilang mga pamiste nga tukma sa mga nahisulat sa ilang kaagi.

Kini nga kalihukan gimugna arun mapakita nga ang tanan mamahimong “balaan” kung kita magmasinugtanon sa mga kasuguan sa Ginoo, bisan dili garantiya nga kitang lumilihok sa simbahan mamahimo nang balaan.

Diha sa pagsaulog sa adlaw sa mga kalag nahimo nang tradisyon sa mga pagano, ang daghang ritwal, mga seremonyas, aron mukonekta sa mga espiritu, ug gisaulog pinaagi sa pag takuban diha sa kasootan.

Apan arun mahatagan usab ug kahulugan ug mapatin-aw sa ubang magtotoo o mga kabataan ang tinood nga selebrasyon, naghimo ang simbahan ug kalihukan nga mahatagan ug kinabuhi ug mahulagway ang atong mga mga santo o santa ug masabtan sa katawhan nga nabuntog ang dautan pinaagi sa paghimo ug maayo.

Ang nahimong mananaug niadtong adlawa si Caryll Shaine Ongue, nga naghulagway ni Saint Therese of the Child Jesus, gisundan ni Yolanda Jaminar isip St. Teresa of Calcutta ang ikatulo mao ang nag hulagway kang St. Scholastica nga si Rollen Mae Rojo ug St. Catherine of Siena nga si April Love Sencio ug ang ika-upat mao ang naghulagway kang St. John Paul the II nga si Florencio Lodripas Jr. ug daghan pang uban nga naghatag ug bili sa kinabuhi pinaagi sa pagdala sa mga titulo sa mga santo ug santa.

Kita usab’ kung maghimo ug maayo ug mosunud kita kang Jesu Kristo mamahimo usab kitang balaang mga santa ug santo sa kasamtangang panahon. (Rosalinda Jabonillo | GKK Coordinator, SPC SocCom)