Digos: Pagsimba sa Kalag-kalag

Giawhag karon sa Dayosis sa Digos ang magtutuo nga sa adlaw sa mga patay sa Nobyembre 02, 2022 nga unahon ang pag-ampo diha sa Santos nga Misa una paman nga muadto sa sementeryo, alang sa pagduaw sa mga mitaliwan na nga myembro sa pamilya ug higala didto sa sementeryo.

Sumala sa pahayag ni Diocesan Commission on Social Communications Director, Rev. Fr. Allan Joie Nuñez, giawhag ang mga magtutuo nga unahon ang pag-adto sa Simbahan alang sa pagtambong sa Santos nga Misa, tungud gikinahanglan, nga magsaulog ug sakripisyo, aron matangtangan sa sala ang mga nangamatay.

Pagpasabot sa pari nga kinahanglan ang pagadto sa simbahan ug pagtambong sa Santos nga Misa tungud panahon kini sa pangaliyupo ug pagampo alang sa mga kalag.

Gidugang nga ang mga nagapanaw pa niining kalibutan, kinahanglan nga motabang sa mga kabanay nga tuod mitaliwan na sa laing kalibutan, apan nagkinahanglan sa pagampo alang sa kaluwasan.

“Adunay mga agolo sa mga nangamatay, nga gusto maka lingkawas sa kangitngit, busa tabangan nato sila, tungud nanginahanglan kita sa Dios, busa misa ang ilahad nato kanila”, pahayag ni Fr. Nuñez.

Gidugang sa pagpasabot nga ang pag-adto sumala pa sa sementeryo, nga pagdala sa bulak, kandila, suman, bingka, alang sa padayon nga pagpadayag sa paghigugma sa mga minatay, apan ang tinuod nga gikinahanglan mao ang pag-ampo sa Ginoo, aron mabalhin sila nga mitaliwan, sa paraiso nga gisaad sa Ginoo.

“Ang makatabang mao ang pag-ampo, dili bulak, kandila, suman, bingka, ug ubang gasa apan ang ilang tinuod nga gikinahanglan ang pag-ampo,” sigun ni Fr. Nuñez.

Samtang giklaro nga kung aduna may mga Santos nga Misa diha sa sementeryo, didto na lamang mo tambong, ug dili na muadto sa simbahan, alang sa pag-ampo.