Ang Kamahinungdanon Sa Templo Sa Dios

Ika-33 nga Domingo sa Ordinaryong Panahon (November 13, 2022)
Malachi 3:19-20A / Psalm 98 / 2 Thessalonians 3:7-12 / Luke 21:5-19

Niining ika-katloag-tulo nga Dominggo sulod sa ordinaryong panahon, si Hesus nagdapit ug nagpahinumdom kanato nga ang gingharian sa Dios dili susama sa atong panan-awon nga pisikal nga katahom sa usa ka templo. Kondili, nag hulagway kini sa iyang kaugalingon ug pakigrelasyon niya kanato sa inadlaw-adlaw natong pagkinabuhi. Tugoti ako sa pagpaambit kaninyo niining akong pamalandong bahin sa ebanghelyo nga gisaysay kanato ni San Lukas nga atong nabasa ug nadungog karun. Una, si Kristo mao ang sagrado nga templo. Ikaduha, ang pagpuyo ug pagtuman sa templo sa Dios nagkinahanglan sa gasa sa paglahutay diha sa adlaw-adlaw natong pagpuyo ug pakigrelasyon sa uban.

Una, si Kristo ang labing sagrado sa mga templo; siya mao ang Templo. Si Hesus ang buhing larawan sa panag-abot sa tawo ug Ginoo. Ang templo ang dapit kung diin ang Ginoo magpuyo uban ang tawo. Tungod sa kaniadto, ang Ginoo halayo sa tawo. Ang Ginoo gisimbolo susama sa adlaw, dunay gahom, ug gigikanan sa kinabuhi, apan kung muduol ka niini masunog ug mamatay ka. Sa pagkabuhi ni Kristo, siya ang nahimong tulay, siya ang hinungdan nga kita makaduol ug haduol na sa Dios. Kita paingon sa templo, magtapok sa templo, ug magpuyo sa templo.

Ikaduha, aron nga makaambit kita diha sa Diosnong kinaiya ni Hesus, gikinahanglan nato ang gasa sa Paglahutay. Kita makatagamtam lamang sa kinabuhing dayon nga gisaaad sa Dios kung kita andam nga molahutay sa mga pag-antus diha sa pagkinabuhi uban ang gugma ug kalooy sa Dios. Si San Pablo naghisgot bahin sa pagdagan sa lumba ug pagdaog sa lumba sa kinabuhi. Si Kristo nagtudlo kanato mahitungod sa katapusang kadaugan ug sa pagkab-ot niini, nga kinahanglan dili nato ilimod ang Dios. Apan usahay sa atong pagpanaw nahimo kita nga huyang, ug adunay daghang mga paagi sa atong kinabuhi nga atong gilimod ang atong Dios. Mosalig kita diha kang Kristo ug dili sa atong kaugalingong buhat. Magpadayon kita pinaagi sa grasya nga iyang nadaog alang kanato didto sa kalbaryo.

Sa kataposan, si Hesus nagdapit kanato sa paglahutay, sa pagbarug nga lig-on atubangan sa kalisdanan, sama sa usa ka templo nga gitukod ni Hesus. Isip resulta niini, atong masiguro ang atong kinabuhi, atong kalag, atong walay katapusan nga kalipay—ang kinabuhi sa atong kalag, mao ang atong pakigrelasyon diha sa Dios. Ang pagkamalahutayon nagpasabut nga kita magpadayon, bisan kung kita gikapoy, gibatig kahuyang, ug nawad-an sa kadasig. Mabuhat lang nato kini kon atong tugotan si Kristo nga mouban kanato aron sa pagpataas kanato. Sa pagkupot ug pagsalig nato sa Dios, mamahimo kitang lig-on nga puno sa iyang gugma ug kalooy ug labaw sa tanan sa pagpuyo diha sa iyang makanunayong panaad nga mahiusa kita Kaniya diha sa iyang gingharian. (Bro. Julius Lugay)