Ang Gingharian Sa Anak

Solemnidad sa Pagkahari ni Kristo (November 20, 2022)
2 Sam. 5:1-3 / Ps. 122: 1-2, 3-4, 4-5 / Col 1:12-20 / Lk. 23:35-43

Si Hesus, nagpakita kanato nga Siya mao gayod ang Pinili, ang Mesiyas, ug ang Hari sa mga Hudeo. Apan sa Ebanghelyo karong adlawa, madungog nato kining mga titulo ni Hesus sa mga ngabil niadtong wala mituo Kaniya— ang mga nagmando sa Israel, ang mga sundalo, ug ang usa ka kriminal nga gilansang tapad Kaniya.

Nakita ra nila ang eskandalo sa usa ka duguang lawas nga gilansang sa krus. Ila Siyang gibiay-biayan sa mga pulong ug mga lihok nga gitagna sa mga Kasulatan sa Israel (tan-awa sa Salmo 22:7–9; 69:21–22; Kaalam 2:18–20). Kung Siya ang tinuod nga Hari, luwason Siya sa Dios, matod pa nila. Apan wala Siya mianhi aron luwason ang Iyang kaugalingon, kondili aron luwason sila—ug luwason kita. Ang maayong kawatan nagpakita kanato kon unsaon pagdawat sa kaluwasan nga Iyang gitanyag kanato. Iyang gisugid ang iyang mga sala, miila siya sa iyang katakos nga angay siya mamatay alang kaniya. Ug siya mitawag sa ngalan ni Hesus aron mangayo sa Iyang kalooy ug kapasayloan.

Pinaagi sa iyang pagtuo siya naluwas. Si Hesus “nahinumdom” kaniya—ingon nga ang Dios kanunay nga nahinumdom sa Iyang katawhan, mibisita kanila uban sa Iyang makaluwas nga mga buhat, nag-ihap kanila isip Iyang pinili nga mga manununod (tan-awa sa Salmo 106:4–5). Pinaagi sa dugo sa Iyang krus, gipadayag ni Hesus ang Iyang Pagkahari—dili pinaagi sa pagluwas sa Iyang kinabuhi, kondili pinaagi sa pagtanyag niini isip lukat para sa atoa. Ang Amahan naghimo kanato ngadto sa “Gingharian sa Iyang hinigugmang Anak,” sumala sa gisulti kanato sa Sulat karong adlawa.

Ang Iyang Gingharian makab-ot pinaagi sa Simbahan, ang bag-ong Jerusalem ug ang Balay ni David nga atong giawit sa Salmo karon.

Pinaagi sa ilang pakigsaad kang David sa Unang Pagbasa karong adlawa, ang katawhan sa Israel nahimong “bukog ug unod” uban sa ilang hari. Pinaagi sa bag-ong pakigsaad nga gihimo sa Iyang dugo, si Kristo nahimong usa ka unod uban sa mga tawo sa Iyang Gingharian—ang pangulo sa Iyang lawas nga mao ang Simbahan (Efeso 5:23–32). Kining pakigsaad, atong gisaulog ug gibag-o kada pagsaulog nato sa Eukaristiya diin kita nagpasalamat sa atong katubsanan ug naglaom sa adlaw nga kita usab makauban Kaniya sa Paraiso. (Bro. Ignatius Gonzales, CFA)