4 Basic Seminar Alang Sa Soccom

Malampusong gipahigayon kaniadtong Oktubre 30, 2022 ang Four (4) Basic Seminar alang sa tanang GKK SoCCom nga sakop sa St. Mary of the Perpetual Rosary Parish, Buhangin isip pagpangandam sa umaabot nga renewal ug sending forth diin gihimo sa Parish Seminar Hall.

Gisugdan ang seminar pinaagi sa pagparehistro sa mga partisipante sa alas siete sa buntag nga gikan sa napulo ka zona nga sakop sa Parokya. Mikabat og Saysentay Otso (68) ka mga partisipante nga kanhi mga SoCCom apil ang mga bag-o nga andam modawat isip GKK SoCCom gikan sa mga nagkalain-laing GKK.

Gipahigayon ang seminar proper pinaagi sa Pasiunang Pag-ampo nga gipangulohan ni Sis.Maria Dexie Calvo. Misunod ang paghatag og Orientation sa Parish SoCCom Coordinator, Ma’am Hermelita Mapute diin ang katuyoan o tumong sa panagtigum aron mahatagan og insaktong kaalam susama niini ug sa pagapil sa ubang kalihukan aron sa pagkat-on sa mga buluhaton ug mahuptan sa kanunay ang tinood nga sumbanan sa paglawig diha sa pag-alagad ug sa matinud-anong pag-ako sa mga responsibilidad sa tanang mga GKK SoCCom diin adunay kalambigitan sa Social Communications.

Gipasabot ang Rationale sa Four Basic Seminar sa Parish Formation Ministry Coordinator, Sis. Lina Montilde. Gisaysay ang importansya kon adunay kaalam ug kahibalo sa mga sukaranan diha sa pagpadayag sa kaakuhan ngadto sa paglawig sa Kristohanong kalihukan.

Ang unang topic mao ang Evangelization Seminar nga gipangulohan sa Evangelization Team Coordinator, Sis. Flor Lupo, ug gipasabot ang una ug ikaduhang bahin sa rolyo ni Sis. Sally Maybuena ug gisunod dayon ang ikatulo ug upat nga series ni Bro. Carlos Maybuena. Pagkahuman sa break, gisunod dayon ang ikaduhang topic nga mao ang GKK Orientation Seminar nga gipangulohan sa GKK Coordinator, Sis. Tina Catigara kauban sila Sis. Jo Paningbatan ug Sis. Nitz Rodriguez.

Pagkahapon gipadayon ang ikatulong topic nga mao ang Basic Bible Seminar diin gipangulohan sa BBS Coordinator, Sis. Carlita Leone ug gihatag ni Sis. Anita Balio ang Introduction, ug ang mga kumperensya ni Sis. Malou Pantonial. Ang ikaupat ug katapusang bahin sa seminar mao ang Basic Liturgy ug kini gipaambit ni Bro. Jun Nardo, PSL Parish Coordinator. Migahin usab og higayon aron sa pagtubag sa mga pangutana nga gipaabot sa mga partisipante sa pag klaro sa mga kalibug ug mga butang nga gusto mahibaloan. (Arsenio H. Berdera, Jr., GKK SoCCom | Photos: Nitz Nartea, Cha Ampalayo, JB Berdera)