Walay Hunong Sa Pag-Ampo

Ika-29 nga Domingo sa Ordinaryong Panahon (October 16, 2022)
Ex 17:8-13 / Ps 121:1-2, 3-4, 5-6, 7-8 / 2 Tim 3:14-4:2 / Lk 18:1-8

Ang bibliya napuno sa mga balasahon bahin sa pag-ampo ug ang panginahanglan sa pagpadayon sa pag-ampo. Sa pagkatinuod, ang ebanghelyo karon giulohag Ang Sambingay sa Mapadayonon nga Pag-ampo apan tungod sa kadaghang bersyon sa bibliya, gitawag sab kini nga Ang Sambingay Mahitungod sa Biyuda ug sa Maghuhukom. Kini nagsulti kanato sa pagpadayon sa pag-ampo adlaw ug gabii, ug ang Dios sa Iyang kaluoy ug sa Iyang hingpit nga panahon, Siya mohatag kanato sa atong gihangyo.

Si San Pablo nag-ingon, “Pagmalipayon kamo kanunay. Pag-ampo sa tanang panahon ug pagpaslamat kamo bisag unsay modangat kaninyo. Kini mao ang kabubut-on sa Dios nga buhaton ninyo sa ngalan ni Kristo Hesus. (1 Tesalonica 5:16-18) kay usahay hilom ang Dios kon mag-ampo kita. Posible nga dili kanunay ihatag sa Dios ang atong giampo apan wala kini magpasabot nga wala na Siya mamati kanato. Siya nahibalo kon unsa ang maayo alang kanato ug tingali ang atong gipangayo Kaniya dili ang labing maayo alang kanato. Busa gikinahanglan nga dili kita mawad-an sa kasingkasing sa pag-ampo.

Ang kinabuhi adunay mga pag-uswag ug kalisud. Kon kita nakasinati ug kalisud, dili kini magpasabot nga kita mawad-an ug paglaum. Mahimong nagpasabot ang panahon nga moduol kita sa atong Amahan sa langit ug mas mosalig Kaniya. Kanunay natong madungog ang mga pulong nga adunay rason ang tanan nga nahitabo sa atong kinabuhi. Sa pagkatinuod, bisan sa atong labing mangitngit nga higayon, ang Dios moabot aron sa pagtubos kanato ug sa pagpakita kanato sa Iyang himaya. Sa tinud-anay lang, ang kadtong nagtugyan sa tanan ngadto sa Dios, makita niya ang tanang maayong buhat sa Dios sa iyang kinabuhi.

Ang katapusang bersikulo sa ebanghelyo naghisgot kang Hesus mahitungod sa Iyang pangutana kon makakaplag ba kaha Siya ug pagtuo dinhi sa kalibutan sa Iyang pagbalik kay taliwala sa dagkong mga kasakit ug pagsulay, dali ra kita mawad-an ug kadasig. Mao nga, kinahanglan natong huptan ang atong pagtuo pinaagi sa walay hunong nga pag-ampo. (Bro. Ignatius O. Gonzales, CFA)