PSK, PSKB og PSB sa San Roque Parish-Malabog, Kinasing-kasing nga Nangilabot

Niadtong ika-25 sa Septyembre tuig 2022, nagmalampuson ang gipahigayon nga pormasyon sa Ministriya sa PSKB, PSK og PSB. Isip pagpangandam, miapil una sa Santos nga Misa ang mga partisipante. Sa homiliya ni Father Arnold Balaquinto, kura paroko, iyang gitagaan og gibug-aton ang pangutana nga “Unsa may labot nako?”. Kitang tanan adunay kalabutan kon koneksyon sa matag-usa. Kinahanglan nato nga mohatag og pagtagad diha sa atong isigka-tawo, isip Iyang mga piniyalan.

Human sa Santos nga Misa, dayon nga gipaila ang unang mamumulong, og kini mao si Father Orlando Angelia, kinsa mipaambit sa iyang bulawanon kaayo nga mga pulong. Matud pa niya “Ang hulagway sa kinabuhi sa pamilya sa tibuok kalibutan, adunay joy and pain, mga kangitngit og kalisdanan”. Iya usab nga gipahinumdom nga ang PSKB adunay dako nga kalabutan sa matag katilingban, uban ang PSK ug uban pang mga GSL, mao kini ang motan-aw sa matag pamilya, apil ang PSB o batan-on nga produkto sa matag pamilya.

Human sa paniudto, adunay nahitabo nga Election of Lead Couples nga gipangunahan sa magtiayon nga sila Mr. Ed and Mrs. Susan Andoy – FLA/Parish Pastoral Team sa St. Joseph Sasa. Ilaha usab gi hisgutan ang mga mamahimong responsable nga mapili. Napili si Mr. Ramel & Mrs. Joy Madijanon isip FLA Coordinators; Mr. Wendel & Mrs. Cherry Mae Delgado – PSKB Coordinators; Mr. Benjo & Mrs. Regielou Cabodte – Pre-Cana Lead Couple; Mr. Alberto & Mrs. Maribel Ticong- Mansebado Lead Couple; Mr. Nelson & Mrs. Jocelyn Ogahayon – Marriage Enrichment Seminar Lead Couple; Mr. Bengie & Mrs. Jessah Mie Arnaiz – BOM-Natural Family Planning Lead Couple; Mr. Roberto & Mrs. Salvie Dela Torre – Family Mentoring Lead Couple; Mr. Anthony & Mrs. Lucresia Dela Cerna – Vocation Promoter Lead Couple; Mr. Aries & Mrs. Lovilla Gallardo-Secretary; og Mr. Eddie & Mrs. Alma Novo, Mr. & Mrs. Rey Villarmia, Mr. Jemar & Mrs. Maribet Abuton, Mr. Josepino & Mrs. Lee Manceras- Zone Coordinators.

Ang ulahing mamumulong mao ang magtiayon nga si Mr. Romy and Mrs. Joy Lestojas – Parish Pastoral Team sa St. Joseph, Sasa. Sila mipaambit nga sa pagkinabuhi isip Kristohanong pamilya, anaa ang pag-ampo, serbisyo og sakripisyo. Dili man man kita mamahimong perpekto, apan ang tanang pagsulay molabay ra gayud labaw na nga anaa ang Ginoo sentro sa atong kinabuhi.

“As a new FLA Coordinator, kulba uban ang kalipay ug kahinam, kulba tungod kay kini adunay dakong kaakuhan,nga nagtangag sa dakong pangutana nga KAYA NAMO? apan lipay kay bisan nagpahipi lamang kami Iya kaming gitawag busa amo kining tubagon, among gihuptan ang saad sa Salmo 37:5 na: “Itugyan ang tanan sa Ginoo, salig Kaniya ug tabangan ka Niya”, mensahe sa magtiayon nga Mr. Ramel og Mrs. Joy Madijano, napili nga FLA Coordinator sa parokya sa Malabog.

Adunay mga higayon sa atong kinabuhi nga kita makapangutana, “Unsa may labot nako?”. Kasagaran walay lain nga maka tubag niini, ato ra usab nga kaugalingon og kana pinaagi sa pagpamalandong. Atoang hinumdoman nga sa kununay kita kinahanglan nga mangilabot sa matag-usa, kay kana ang usa sa mga diwa sa pagkapiniyalan ibabaw niining kalibutan.

Sa Kanunay, Dalaygon ang Diyos. (Jozel Crudua | Youth Soccom)