Pagpalawon sa Bokasyon

Nagpahigayon og vocation symposium ang Davao Archdiocesan Commission on Vocations kauban ang Davao Archdiocesan Youth Coordinating Apostolate o DAYCA kaniadtong adlawng Sabado, Septyembre 24, sa Mindanao Regional Major Seminary nga adunay temang “Family: Seedbed of vocation”. Gitambungan kini sa mga kabatan-onan nga naggikan sa nagkalain-laing parokya sulod sa arkidayosis ingon man ang mga ginikinanan sa mga seminarista ug mga relihiyoso. Kini subay sa pagsaulog sa Archdiocese of Davao sa Vocation month.

Gisugdan ang maong panagtigom sa santos nga misa nga gipanguluhan ni Reberendo Padre Marbendear Morallas nga nagpalipay sa mga mitambong tungod sa iyang mga pasi-aw panahon sa homiliya. Gisundan dayon kini sa pagbahin-bahin sa kapin kinyentos ka mga partisipante alang sa group sharing kung asa sulod niini gihisgutan ang gugma nga gikutlo sa santos nga ebanghelyo ni San Juan kapitulo 15 bersikulo 9 hantod 11. Emosyonal ang uban nga partisipante human sila nagpadangat sa ilang pagbati mahitungod sa gugma, gugma nga ilang nasinati sulod sa ilang pamilya, hilabi na sa ilang ginikanan, gugma nga nasinati gawas sa pamilya. Sa maong panagambitay nasayran ang nagkalain-laing pagsulay na ilang nasinati isip batan-on.

Samtang gipahitabo ang mga nagkalain-laing mga aktibidad nakapalibot usab sa venue ang mga booth sa mga congregation sulod sa arkidayosis nga mamahimong bisitahon sa mga partisipante kung buot pa nila mapalawman ang ilang mga tawag o aduna silay mga gustong masabtan bahin sa maong congregation.

Gipahigayon usab ang segment nga gitawag ug Good Samarites, diin adunay giimbitahan nga mga speakers gikan sa nagkalain-laing bokasyon sa kinabuhi nga mao ang tawag sa kaminyoon, pagpakapari, relihiyoso ug pagkinabuhing ulay. Dinhi gipaambit sa mga speakers ilang kasinitian, mga testimonya ug mga sinyales nga gitawag sila sa maong bokasyon sa kinabuhi. Makahimoot usab ang mga host sa maong segment nga mao sila Father Ronald Arcillas ug ate Mary Ann “Maan” Almeria. Tumong sa maong segment, nga mapalawman pa ilang pagsabot sa bokasyon ug matabangan ang mga batan-on kung unsa ang ilang tawag sa kinabuhi. Sulod sa segment nagpakita usab sa ilang nagkalain-laing talento ang mga seminarian sa REMASE, nagpamatood nga dili lang sila basta seminarista kondili mga talentadong seminarista. Naghatag usab ug presentation ang San Pedro Cathedral Youth Apostolate diin ilang gikanta ug gisayaw ang kantang IDANA. Wala usab nagpaulahi ang mga madre, pari, ug mga brothers sa ilang dance presentation sa tugtug nga Magpuri Ka.

Gitapos ang maong event sa bendisyon nga gihatag ni DAYCA director Father Mark Kim Samones. (Jomar Earl Narciso)