Mga Anghel Timaan Sa Pagpangga Sa Dios

(Excerpt from the Homily of Most Reverend Romulo G. Valles, D.D., on the 18th Parochial Fiesta Celebration of San Miguel Parish, Marahan, Davao City, September 25, 2022)

Kining adlawa atong gisaulog ang kapistahan sa atong mahal nga patron Sr. San Miguel, ug matag Dominggo gisaulog nato ang kadaugan sa atong Ginoong Hesukristo. The victory of Christ for us. Diha sa Iyang pagpildi sa kamatayon Iyang gipuli ang pasalig nga adunay ganti sa kinabuhi tungod sa Iyang pagkabanhaw. Matag Dominggo mga igsoon dili lang nato obligasyon ang mosimba, apan maghiusa kita pinaagi sa maanindot nga pagpahinumdom kanato nga kitang tanan “we are so precious” sa mata sa Ginoo. Iyahang gihatag ang tanan nganhi kanato, ang Iyang kaugalingong anak gihatag Niya kanato ug gihurot Niya ang Iyaha sa paghatag kanato. To come to Mass every Sunday, is a great assurance that no matter what, bisag mahurot ang kalibutan ug miski walay mag atiman kanato, but God with His eyes kanunay nagbantay kanato, and that is the beautiful meaning of Sunday.

Mao sad na ang rason o hinungdan nga anaa kanato ang mga anghel, ang atong patron Archangel Michael. Sila timaan sa dakong pagpangga sa Ginoo kanato. The angels are extensions, manisfestation o pagpakita sa pagpangga sa Dios kanato. Kay gipangga man kita sa Dios Iyaha gayod kitang protektahan. The Divine power nga iya sa Dios kanunay Niyang ihatag kanato ug usa sa paagi niana mao ang mga anghel nga magbantay kanunay kanato. Mao kana ang atong gisaulog karung Dominggoha. Gikuha kita sa Dios, Iyaha na kita, ug gimahal kita Niya, Iyahang isustain ug pagabantayan kita sa kanunay. Usa sa mga great traditions of the Church mao ang atong pag-ila sa mga angheles ug mga Arkanghel sa Dios nga kanunay nagpaluyo ug nagpabati kanato sa Iyang pagpangga ug pag-atiman.

Karung pistaha, tulo ka butang ang nindot kayo nga pamalandongan nato. Uban kanato ang atong Patron nga si Sr. San Miguel Arkanghel, nga uban kaniya panalipdan ang atong pagtoo. Uban kaniya maningkamot kita o matag-usa kanato nga protektahan ang atong pagtoo. Apan sa unsa nga mga punto? Una, ang atong pagtoo nagtawag kanato sa paglantaw sa langit ug yuta ug aduna gayod kitay adtuan. Karung Dominggoha, hangyoon nato si Sr. San Miguel nga ubanan kita sa atong distinasyon paingon didto sa langit. A good faith, a faith that is alive with the sense of heaven.

Ikaduha, ang pagtoo nga buhi, ang pagtoo nga dili iya-iya, maoy makapaadto kanimo sa langit ug makabaton sa kinaiya nga Diosnon. Tungod kay pinangga kaayo ta sa Dios, Iyaha gayod ihatag tanan kung unsay anaa Kaniya. Matud pa ni Pope Francis sa Iyang topic, ang Dios mercy and compassion, bigay tudo gayod siya nganhi kanato. Busa, kung padulong kita sa langit ug mo-ipon sa Dios angayan lamang usab nga ang atong pagtoo buhi ug magbaton sa kinaiya nga Diosnon. Ang tawo nga anaa sa ebanghelyo karun nakalimot sa kinaiyang Diosnon. Ang Iyang silingan nga anaa sa iyang kilid nga nanginahanglan sa iyang tabang, iyahang gikalimtan. Sa Olympic sa Mexico thousands above sea level, kinahanglanon nga mangandam kita og ginhawa dinhi pa lang sa yuta. Ang tawo sa ebanghelyo nakalimot sa gininhawa nga panglangit. Ang buhi natong pagtoo, maoy destino nato padulong sa langit. Ug kung mao kana, mag-anad kita sa lihok ug pamatasan nga panglangit. Busa mangamuyo kita sa Ginoo nga sa kanunay panalipdan kita, ang atong pamilya, ug banay uban sa atong patron nga si San Miguel.

Sa ebanghelyo karun, ang usa ka tawo mihangyo nga pabalikon siya sa yuta aron mapahimangno-an ang iyang pamilya ug iyahang banay sa dalan nga ilang pagaadtuan. Adunay mga nasud nga nagkagamay ang populasyon sa pamilya ug wala kini maprotektahan. Mangayo kita sa panalipod ni Sr. San Miguel nga protektahan ang atong pamilya nga kung anaa na kita sa laing kinabuhi makalingi kita sa atong pamilya nga anaa dinhi ibabaw sa yuta. Maningkamot kita nga ang style sa mithi sa pamilya mao ang style nga Diosnon.

Ikatulo, mangamuyo kita sa Dios nga panalipdan ang atong kinaiyahan. Mga igsoon kining kaamgohan nga nagkaanam og kadaot ang atong kinaiyahan, hinaut nga tabangan kita nga magkahiusa sa pag-atiman sa atong kinaiyahan. Ang atong Santo Papa mao ang naghatag og duso aning tanan nga kinahanglan atong panalipdan ang atong kinaiyahan. Ang mga lideres sa tibook kalibutan nagpaabot gayod sa kung unsa ang isulti sa atong Santo Papa bahin sa pagpanalipod sa atong kinaiyahan. Ang punto ni Papa Francisco mahitungod sa kinaiyahan, nga kini mao ang primary nga timaan, ug kini dili malalis nga timaan ug proof nga kita pinangga kaayo sa Dios. Kung motalikod kita, mo traydor kita, ug atong panamastamasan ug dili magtahod sa kinaiyahan nga naglibot kanato sa laktod nga pagkaistorya medyo ang atong pagtahod usab sa Dios wala magkadimao. Kung ilhon nato ang Ginoo, atoa usab ilhon ang kinaiyahan nga Iyahang gimugna alang kanato kay kita pinagga gayod sa Dios. Kay diha sa balaang kasulatan ang unang lihok sa Dios mao ang pagpreparar sa kalibutan ug kinaiyahan natong pagapuy-an.

Sa katapusan, niining atong dakong kapistahan mangayo kita sa pagpanalipod sa atong mahal nga makagagahon ug sa atong patron nga panalipdan una, ang atong pagtoo. Ikaduha, ang atong mga banay, ug ang ikatulo ang atong kinaiyahan. Ang pagsaulog sa atong kapistahan adunay kalabutan sa atong adlaw-adlaw nga pagkinabuhi.