Manggihatagong Makasasala

Ika-31 nga Domingo sa Ordinaryong Panahon (October 30, 2022)
Wis 11:22-12:2 / Ps 145:1-2, 8-9, 10-11, 13, 14 / 2 Thess 1:11-2:2 / Lk 19:1-10

Ang atong ebanghelyo karung adlawa nagdapit kanato sa pagpaambit sa atong mga gasang nadawat gikan sa Diyos ngadto sa uban. Ang ebanghelyo nga gisaysasay kanato ni San Lukas nagpahinumdom kanato nga miski aduna kitay mga kasal-anan ug kakulangan sa kinabuhi, mamahimo gihapon kitang mopaambit sa kung unsa may anaa kanato. Si Zaqueo usa ka ilado nga maniningil og buwis. Nasayod kita nga sa mata sa katinglingban ang maniningil og buwis ilado nga makasasala. Apan si Zaqueo naninguha ug naningkamot sa iyang kaugalingon diha sa pagpaambit sa iyang mga gasa ngadto sa uban.

Ang pagpaambit sa gasa sa Diyos ngadto sa uban, wala magalantaw sa estado sa kinabuhi sa usa ka tawo. Matud pa sa panultihon, ““Walay usa nga kabus nga dili makahatag, ug walay bisan kinsa nga dato nga dili makadawat.” Kitang tanan gigahasan sa Diyos diha sa iyang pamaagi. Sa akong pagpamalandong tugoti ako sa pagpaambit kaninyo sa duha lamang ka mga punto: Una, kinahanglan natong ipaambit ngadto sa uban ang gasa nga atong nadawat gikan sa Diyos. Ikaduha, ang pagpaambit sa gasa ngadto sa uban maoy dalan padulong sa kaluwasan nga gi-andam sa Diyos alang kanato.

Una, ang pagpaambit sa kung unsay anaa kanato ngadto sa uban, usa ka kinaiya nga Diyosnon. Si Hesus kanunay nga nagdapit kanato nga mamahimo kitang manggihatagon ngadto sa uban. Ang pagpaambit sa gasa ngadto sa uban usa ka hiyas nga makapahimoot gayod sa Diyos. Sa atong ebanghelyo, si Zaqueo nailhan nga usa ka makasasala nga mipaambit sa iyang mga katigayonan ngadto sa uban ug naningkamot nga mamahimong matarong diha atubangan sa Diyos. Diha sa atong kinabuhi, maningkamot kitang mopaambit sa atoang mga talento o mga gasa ngadto sa uban ug sa simbahan, aron diha sa atong kaugalingon mamahimo kitang angayan atubangan sa Diyos bisan pa man sa atong pagkamakasasala. Ang Diyos wala maglantaw sa kung unsay sala nga atong nabuhat, kondii sa kung unsay atong natabang diha sa uban.

Ikaduha, ang pagpaambit sa kaugalingong gasa ngadto sa uban maoy dalan paingon sa atong kaluwasan. Diha sa ebanghelyo, atong nadungog ang mga pulong ni Hesus nga gipadayag nganha kang Zaqueo og miingon, “Niining adlawa karon, ang kaluwasan nahiabut niining balaya.” Usa ka pulong nga maoy makapahimo sa usa ka tawo nga angayan diha sa gingharian sa Diyos. Diha sa atong kinabuhi, adunay pipila ka mga tawo nga mobiay-biay kanato tungod sa atong mga kasaypanan nga nabuhat. Apan nasayod kita nga sa kataposan ang Ginoo lamang ang adunay katungod nga mohukom kanato. Ang kaluwasan, wala kini nagagikan sa kung unsay ipadayag sa uban nganhi kanato, apan mabatonan nato kini pinaagi sa pagbuhat sa Diyosnong mga buluhaton.

Sa katapusan, ang gasa sa pagpaambit usa ka hiyas nga angay natong mabatonan ug angay natong puy-an diha sa pagpadayon nato sa atong kinabuhi. Angay usab natong hinumdoman nga diha sa atong pagkinabuhi, adunay mga tawo nga dili uyon sa mga butang nga atong gibuhat bisan unsa pa kini ka maayo. Apan, mamahimo natong sumbahan si Zaqueo nga usa ka makasasala nga gidawat ang tanang mga pagbiay-biay kaniya, ug mipadayon lamang siya sa kung unsay gusto sa Diyos alang kaniya. Ang kaluwasan alang sa tanan lakip na kadtong makasasala ug dili alang lamang niadtong mga matarong. Ang pagpaambit sa gasa nga gihatag sa Diyos nganhi kanato mamahimo natong sumbanan sa atong kaluwasan ug mamahimo natong dalan paingon sa Diyosnong gingharian. (Bro. Julius Lugay)