Malampuson nga Pagsaulog sa Kapistahan sa San Lorenzo Ruiz

Malipayon nga gisaulog sa mga parokyano sa San Lorenzo Ruiz Parish (SLRP) ang ilang ika-37 nga parochial fiesta human misalmot ang nagkalain-laing GKK leaders, mga kabatan-onan, mga miyembro sa mga ministriya, ug ubay-ubay nga bisita niadtong Septyembre 28, 2022.

Pasado alas-sais sa buntag nagtapok na ang mga parokyano arun mutambong sa unang schedule sa santos nga misa ug gisundan sa ikaduhang schedule sa alas-otso nga mao ang Pontifical Mass nga gipanguluhan sa arsobispo sa Dabaw Most Rev. Romulo G. Valles, DD.

Human sa Pontifical Mass, sa alas-10 sa buntag, gisugdan na ang feeding program nga gipangunahan sa Archdiocesan Nourishment Center. Kinahapunan, gihimo ang pipila ka mga dula sama sa basketball game exhibition sa mga clergy batok sa mga PSL.

Bisan pa man sa kalingaw, gisigurado sa simbahan nga hapsay ang kapistahan ug dili mahiduol sa disgrasya ug sakit ang mga parokyano. Ang tanang kalihukan malampusong napahigayon. Gikalipay kinig maayo sa Parish Youth Council ug GSL nga maoy nangulo ug nagplano uban usab sa tabang ug supporta nila Parish Priest, Fr. Pepe Retorca ug Fr. Jeric Asdang. (Kevin Dacuno)