Magmainantuson Kita, Sama ni Birhen Maria

Malipayon ug mapasalamatong gisaulog ang ika–61 ka tuig nga kapistahan ni BIRHEN DOLOROSA niadtong Setyembre 15, 2022 uban sa tema “Giyahi kaming imong mga piniyalan ug ubani kami sa paglawig isip nagkahiusang simbahan.”

Nagkahiusa ang mga miyembro sa nagkalain-laing mga ministriya ug komitiba nga gipangunahan ni REV. FR. RICKY PEÑALOSA, kura paroko uban sa Parish Youth Ministry ug Parish Finance Committee nga nangandam aron magmalampuson ang mga kalihokan, ug mahan-ay ang mga kinahanglanon niini.

Gipahigayon ang zonal mass sa mga Barangay Gymnasium sulod sa 9 ka adlaw aron malikayan ang dinaghang panagtapok-tapok . May mga pari nga giimbitahan gikan sa laing parokya aron magsaulog sa Novena Masses.

Atol sa pagsaulog sa adlaw’ng natawhan ni Birhen Maria niadtong Septyembre 8, 2022, gipahigayon ang motorcade sa tanang patron sa 59 ka GKK sa parokya sa Virgen Dolorosa.

Nagmalampuson usab ang nightly cultural presentation nga gilangkuban sa, Babak Night Market, SAMALARO 2022, lokal nga panggamhanan sa IGACOS, Samal Island City College, SK Federation, DepEd, GKK, Nieves Villarica National High School, Coronation of Lakan and Lakambini ng Birhen Dolorosa ug Holy Cross of Babak.

Gipangunahan ni MOST REV. ROMULO VALLES, DD ang pontifical mass sa alas 9:00 sa buntag uban sa mga kaparian sa Arcdiocese of Davao. Gipahinumdoman sa atong halangdong Arsobispo ang katawhan sa Babak nga mag amping ug magmabinantayon kanunay bisan tood sa nagkahinay nga pagluag sa restriksyon tungod sa pandemya.

Matod pa ni Archbishop sa iyang pamalandog nga isip mga kristiyano atong ipakita ug sundon ang hiyas ni Birhen Dolorosa nga mag mainantuson ug mapagmahal nga inahan.

Dugang pa niya dili gyod nato kalimtan ang pag – ampo sa Ginoo sa panahon sa kalisod ug iampo pod ang ubang tawo labaw sa tanan ang katawhan sa tibook kalibutan pinaagi sa pangama ni Birhen Dolorosa.

Nagpasalamat usab si Archbishop Romulo kay Fr. Ricky Peñalosa, sa dakong kausaban sa simbahan tungod sa mga proyekto nga padayon gipahimo bisan sa kahimatang nga natagamtaman.

Human sa santos nga misa gisunod dayon ang mga kalihukan sa GKK Pista sa nayon atol usab sa ika 25 ka tuig sa Gagmayng Kristohanong Katilingban diin adunay booth competition nga gilangkuban sa 7 ka zona, salo-salo ug palaro nga gipangunahan sa Parish Youth Misnistry.

Mapasalamaton si REV. FR. RICKY PEÑALOSA, sa tanang katawhan sa Virgen Dolorosa Parish, ilabi na sa mga GSL, GKK’s, Center organizations ug ang parish youth ministry nga maoy nagpahigayon sa mga kalihukan uban sa suporta sa Parish Finance Committee.

Bisan tuod sa kasamtangang kahimtang nga atong giatubang, sa kasakit ug kalipay… Birhen Dolorosa UBANI KAMI SA KANUNAY. VIVA MARIA! VIVA BIRHEN DOLOROSA!

(Junelda A. Jauod | VDP SoCCom)