“Lumadnong Pilipino, Kabanay sa Diyos” – IP Sunday saulogon

Ang tibuok Simbahan sa Pilipinas ubos sa pagpanguna sa Catholic Bishops Conference of the Philippines – Episcopal Commission on Indigenous Peoples (CBCP – ECIP) magpahigayon na usab sa tinuig nga panagtigum sa tribu sa ngkalain-laing Arkidiyoses ug Diyoses sa nasud.

Sulod sa milabay nga duha ka tuig ilawom sa pandemya wala gitugotan ang panagtigum arun sa paglikay sa kadaut. Apan karon mapasalamaton ang simbahan sa mga pag-ampo nga karon ika-45 ka tuig sa pagsaulog niining “Indigenous Peoples Sunday.” Magkahiusa pagusab ang tribu sa pagsaulog sa kulturanhong pamaagi. Ang simbahan kanunay nakiglawig kanila diha sa ilang mga pangandoy sa pagbarog ug paglambo sa ilang kinabuhi.

Ubos sa tema nga “Lumadnong Pilipino, Kabanay sa Diyos”, karong umaabot nga Oktubre 8-9, 2022 ang simbahan makigduyog pagusab sa kasaulogan niini. Ug tungod kay gideklara man usab nga matag tuig sa bulan sa Setyembre ug Oktubre ang “Season of Creation”, tapuson usab kini lakip sa maong selebrasyon. Ug dinhi kini pagasaulogon sa Arkidiyoses sa Dabaw. Matod pa ni Fr. Jun Acedo, ang Director sa Indigenous Peoples’ Apostolate “mapasalamaton siya sa maong oportunidad nga makaalagad sa katawhang lumad pinaagi niining panagtigum, hinaut mudaghan pa ang magpakabana sa kamugnaan ug magtabang sa katilingban sa lumad sa mga programa sa IPA.”

Fr Jun Acedo, blessing of seedlings during the Care for Creation at Sitio Pamantawan, Malabog, with IP Scholars (Photo: Jun Guadalquiver)

Ang mga kalihukan – sa Oktubre 8 sa alas dos sa hapon dunay pagahimoon nga pagpaambit sa “Laudatu Si – Care for Creation” ug pagasundan kini ug pagpakita ug mga datos sa kasamtangang sitwasyon sa kalasangan sa “watershed” sa Talomo –Lipadas, ang water source sa Dabaw gikan sa Philippine Eagle Foundation ug Bantay Bukid. Lakip niini ang sumada sa gihimo nga pagtoon sa epekto sa “climate change” sa mga mag-uuma labi na sa tribu. Hisgotan usab ang “disaster resiliency and preparedness” sa tribu. Musunod ang “book launching” bahin sa Mangyan sa Mindoro nga gisulat ni Sr. Beverly Romualdo, MIC. Dunay buhaton nga Press Conference human nga mapagula ang mga datos arun mapasibaw pa ang mga “thematic issues” labot sa kausaban sa klima, ang pagkaguba sa kalasangan, ang pagpamalit sa mga yutang kabilin ug unsa ang hagit niini nga dunay kalambigitan sa tahas sa Simbahan. Sa gabii pagahimoon ang 5th Panagtagbo – pasundayag sa mga talento sa sayaw ug awit sa tribu. Didto kining tanan pagabuhaton sa ALMACEN – nga gidumala sa Josefa Segovia Foundation (JSF) – tupad kini sa St. Pedro Poveda Parish, Catalunan Pequeno. Ang JSF hugot nga katambayayong ug nagsuporta sa IPA nga gidumala ni Executive Director Josephine Estopil. Ang programa sa Care for Creation sa IPA gipaluyohan ni Joy Brillos, usa sa mga volunteer worker.

Sa Oktubre 9 2022 pagahimoon ang IP Sunday Celebration didto sa tribung Bagobo – Klata sa Barangay Sirib, dungan sa pagsaulog sa “Menum Festival” Sa buntag dunay pagahimoon nga “tribal ritual” pagasundan sa pagpananum ug kahoy sa palibot sa ADMO area. Ang Santos nga Misa pagapanguluhan ni Arsobispo Romulo G. Valles, DD ug kauban si Obispo Valentin C. Dimoc, DD – ang vicar apostolic sa Bontoc Lagawe ug kasamtangan nga Chairperson sa Episcopal Commission on Indigenous Peoples. Duna usab mga kaparian ug mga IPA coordinators gikan sa South Central Luzon, North Luzon, Visayas and Mindanao Clusters. Duyog kamo sa pagsaulog sa ika-45 Indigenous Peoples Sunday sa Oktubre 9, 2022. (Jun Guadalquiver – IPA)