Lamat sa Among Relasyon Mag-Ina

Dear Ate Emz,

Dili ko mabasol kung ngano ang akong inahan sakit kaayo iyang buot kanako. Tungod kini sa bug-at nga rason. Akoa na nga gi hinulsolan ang mga sayop nga akong nabuhat.

Dala sa akong pagka huyang ako biktima sa sayo nga napaangkan. Duna na akoy usa ka tuig nga anak ug ang akong edad 19 pa lamang. Nasayop ako sa mga butang nga unta dili pa angayan apan unsaon ta man nga nahitabo man ang unta dili pa mahitabo. Sakit na kung sakit nga ikaw isalikway sa imong inahan ug akong dawatun ang consequence sa akong binuhatan. Sayod ako nga sa pag-abot sa tamang panahon mag-uli ra mi puhon. Sa pagka karon tutok ako sa akong anak sa pagpadako nga puno sa gugma ug pagpangga. Wala ko isipa nga bunga siya sa akong kasaypanan kon dili grasya gikan sa kahitas-an. Bisan nag inusara ako sa pag amuma tungod ang amahan sa akong anak walay pagpakabana dili ko na lang pugson aron walay kasamok.

Sa mga kabataan musonod gayud kita sa hustong dalan. Maminaw sa mga maayong tambag sa atong mga ginikanan ug labaw sa tanan ang pagpangayo ug giya sa Dios Amahan nga gabayan ug panalipdan.

Daghang salamat,
Wella

* * * * * *

Dear Wella,

Parents always desire what is best for their children. Tungud niini maningkamot gyud sila nga makahatag og komportableng panginabuhi sa pamilya ug maayong edukasyon aron mamahimong productive citizens ang mga anak, ug makab-ot sab nila ang ilang mga pangandoy sa kinabuhi. Apan usahay bisan unsa pa ang mga paningkamot sa mga ginikanan, dili sab nila ma control fully ang mga desisyon sa ilang mga anak. Busa, usahay naay mga anak nga molihis sa dalan ug makasinati sama sa kahimtang nimo nga nahimong usa ka single parent karon. Makasulti kita nga VALID man ang rason sa imong inahan ngano ing-ana gyud siya kasuko sa imoha. Kasagaran ingon ana gyud ang reaction tungod sa ilang frustration ug disappointment sa mga nahitabo sa imoha. Kung sakit sa imohang bahin ang magka anak sa murang edad ug wala barugi sa amahan sa bata, mas labaw pa ug doble ang sakit nga mabati sa part sa mga ginikanan. Busa, dili nimo mabasol ang imong inahan ngano nga hangtod karon naa pa siyay kasuko sa imoha.

Sumala sa imohang sulat, nagbasol ka ug gidawat nimo ang consequence sa imong kasaypanan.

Kini usa ka makapaubos kaayo nga lihok sa imong bahin ug sigurado ako nga dili sayon alang kanimo nga masinati kining tanan. Nagtuo ako nga ang tanan nakahatag og KALIG-ON sa imong kaugalingon taliwala sa mga pag-antos sa pagpadako sa imong anak. Bisan unsa pa imong sayop, naay usa ka realidad nga WALA GYUD KA GIPASAGDAN SA GINOO. Ug Iya kang gihatagan og igo nga gasa aron masagubang nimo ang tanang mga pagsulay. Labaw sa tanan, daygon ang imong buhat nga pag-amuma sa imong anak nga puno sa gugma ug pagpangga. Mao kini ang importante sa tanan. IT TAKES ONE TO KNOW AND UNDERSTAND ONE. Bahin niini, nagtuo ako nga masabtan na nimo kung unsa sab ka, isip anak, mahinungdanon sa imong mga ginikanan, kung unsa ka nila giamuma nga puno sab sa gugma ug pagpangga. Sa ingon ani nga pamaagi, makaamgo ka nga ang mga ginikanan buhaton ang tanan aron ipakita ug ipabati ang ilahang gugma sa mga anak, kay imo naman karon nasinati kini tungod usa ka na ka inahan. Dugang pa niini, nagtuo ako nga ikaw mamahimong mahigugmaong inahan dinha sa imong anak! Salamat sa gugma nga gigasa sa Ginoo sa imoha.

Sa kasamtangan, naa na gyud kay hugot nga pahimangno sa ubang mga kabataan nga dapat mosunod gyud sa hustong dalan pinaagi sa pagsunod sa ginikanan kay sila motudlo ug motambag gyud kung unsay kaayuhan alang sa mga anak. Hinaut unta nga kining imong kasinatian mosilbi nga usa ka pagtulun-an alang sa mga kabataan karon.

Remember, sometimes God writes straight with crooked lines…He allows us to commit mistakes so that we will learn valuable lessons that could lead us to straighten our paths. EVERYTHING IS GRACE. Tungod niini hinaut nga dili nimo buhian ang imong pagkupot sa Ginoo kay Siya ang GUGMA nga naa nagapuyo sa imong kasingkasing aron mapaambit sab nimo kini sa imong anak ug sa uban.

Sa kasamtangan, padayon lang sa pag-ampo nga mahimong malumo sab ang kasingkasing sa imong inahan aron mohari na sab ang gugma dinha, puli sa kasuko ug sakit nga iyaha pang gihuptan sa kasamtangan Just be patient and do loving actions for her in spite of everything. Let LOVE reign in your life!

God bless you more.
Ate Emz