Unang Catechetical – Pastoral Formation, Hapsay nga napahigayon sa SFAMS Banate

Sama kang Kristo nga unang mialagad ug mihatag sa iyang kaugalingon, kita usab angayang mubuhat niini isip iyang mga tinawag ug piniling katawhan.

Setyembre 17, 2022 adlaw’ng Sabado, hapsay nga napahigayon ang unang Catechetical-Pastoral Formation nga gi-apilan sa tanang nagkalain-laing Apostolado ug mga lumilihok sa simbahan diri sa atong Mission Station, St. Francis Of Assisi.

Ang maong pormasyon gisugdan pinaagi sa Santos nga Misa dayon gisundan ug usa ka input nga gihatag sa atong Mission Administrador, Rev. Fr. Richard O. Laquinon, DCD nga nagpokus mahitungod sa mga butang nga kinahanglan hatagan ug dakong pagtagad sa atong bag-ong kapanahunan isip mga magsasangyaw. Kita mga misyonero, busa gidasig kita sa pagsangyaw sa maayong balita ngadto sa mga kabus natong igsoon ug ang paghatag ug atensyon, pagtinguha ug paghimo’g mga katekesis sa mga hugpong sa mga kabatan-onan. “We should be mission-oriented that has Pastoral care for people in communion and good coordination because we are co-responsible for evangelizing.” dugang PA ni Fr. Richard.

Pinaagi niining CPF nga kanhi gitawag ug Center Formation, nahatagan na gayud ug higayon ang mga nagkalain-laing Apostolado nga magkita, magkamustahay, magsandurotay sulod sa pila ka tuig. Human sa maong input, Gihatagan ug panahon ang matag Apostolado nga magtapok ug maghisgot-hisgot sa mga katikaran ug mga Plano sa ilang tagsa-tagsa ka GKK’s.

Pagka hapon niana, gihatagan ug higayon ang mga lideres sa kada-Apostolado nga mupaaambit sa ilang nahisgutan nga kalihukan ug mga Plano. Pagkahuman gisugdan dayon ang meeting Para sa mga pagpangandam alang sa umaabot nga kapistahan ni San Francisco. Gitapos ang Maong pormasyon pinaagi sa pag-Ampo sa Pangaliya alang sa pagpasalamat sa mga Laykong Pilipinhon. (SocCom Ministry, Banate)