Sakto Ba Akong Desisyon?

Dear Ate Emz,

Ang akong kasinatian nga gusto ipaambit mao kining mga desisyon sa kinabuhi nga sa atong pagtoo tama apan diay to mali. Nasinati nako nga mi taliwan ko sa akong trabaho kaniadto kay dunay opurtunidad nga miabot. Sa akong panglantaw nga mas nindot ug mas okay apan diay to sayop nga panghuna-huna. Hinoon pipila ka beses ko nga gipamalandungan apan nasayop gihapun ako. Ang akoa man gud gihandom nga basin mas ma okay ang akong kahimtang. Wala ko gihulat ang mga signs, wala ko paminawa ang mga tambag, wala ko gilantaw ug timbang ang posibleng dangatan.

Akong nakat-onan ang pagtulun-an. Angay lamang nga magmasinugtanon ako sa kabubut-on sa Dios. Kung unsay Iyang pagboot dapat matuman, ug dapat discernment, lawom nga pag-ampo sa paggabay nga mamahimong han-ay ug haom ang tanan. Dapat ang Ginoo mao ang sentro sa pagpanarbaho ug dili ang maka angkon sa material nga bagay ug sariling interest aron maharuhay.

Karon akong gimahayan ang mga higayon nga akong gisayangan. Tama ra sab nga ako kining nasinati nga aron ako makatoon ug leksyon.

Daghang Salamat,
Manuel

* * * * * *

Dear Manuel,

Ang kinabuhi usa ka serye sa mga pagpili, busa, kung asa man kita karon, kasagaran resulta kini sa atong mga desisyon.

Ang trabaho nga atong gipili o bisan ang pag-balhin og kompanya nga trabahuan maoy usa sa mga dagkong desisyon nga atong mahimo. Sumala sa obserbasyon sa usa ka human resource director sa kompanya nga akong nailhan, ang henerasyon daw sa mga empleyado karon dili mahimutang ug usahay bag-o lang nga na-hire apan nangita na silag kabalhinan nga usa na pud ka bag-ong kompanya. Dugang pa niya, ang mga amo sab dili na makasalig sa mga empleyado nga magmaunongon sa ilang kompanya, bisan pa nga mahimo silang committed sa ilang mga buluhaton samtang nagtrabaho pa kini alang kanila.

Sa imong sitwasyon nahisgotan nimo nga human ka nibalhin og bag-ong kompanya, imong nahibaw-an nga ang desisyon sa pag-ilis sa amo kay sayop diay. Nakaamgo ka kung unsa ka grabe ang desisyon nga nahimo tungod kay adunay daghang aspeto nga wala diay nimo mahunahunaan sama sa pagtimbang og maayo sa mahimong dangatan, mga sugyot nga wala gipaminaw, o wala gihulat ang mga timailhan. Sa pagkatinuod, ang kasinatian mao ang labing maayo nga magtutudlo, busa nakakat-on ka sa usa kamahinungdanon nga leksyon sa kinabuhi.

Ug karon nga naa ka na dinha sa imong gitrabahoan, aduna kay gibati nga pagmahay. Kung imong hunahunaon, unsa ang mahitabo kung magpadayon ka sa imong mga adlaw sa pagtrabaho nga kanunay magbasol sa desisyon nga imong nahimo? Sigurado nga kini adunay dili maayong epekto sa imong mga buluhaton. Mahimong negatibo ang imong tinamdan sa trabaho tungod kanunay nimong ginahunahuna nga sayop nga naa ka dinha nga kompanya. Mahimo sab nga nagatrabaho ka uban ang bug-at nga kasingkasing, busa, ang mga buluhaton mahimong doble nga bug-at, ug moresulta sa walay kalipay.

Sa laing bahin, unsa kaha kung imo na lang panghimuslan ang imong nahimutangan karon? Wala lang nahisgotan sa imong sulat kung unsa ka na kadugay dinha sa imong gitrabahuan karon. Kung bag-o ka pa, tingali nag-adjust ka pa sa bag-o nga work environment. Masabtan ra kanang imong gibati tungod kabahin kini sa mga kabalaka nga masinati sa mga bag-o nga empleyado.

Kung mamalandong ka pa og lawom, tingali mas madiskobrehan pa nimo kung unsa pa ang laing mensahe sa Ginoo alang kanimo. Hatagi ang imong kaugalingon sa panahon aron mas masabtan nimo kung unsa ang Iyang kabubut-on. Abrihi ang imong panghunahuna ug kasing-kasing aron imong maklaro ang pikas nga bahin sa imong giisip nga sayop nga desisyon nga imong nahimo. Nagatuo ako nga naa gyud kay makuha nga positibong resulta niining murag negatibong sitwasyon kung asa ka karon. Kini usa ka paagi sa pagpakita nga ikaw nagpadayon gihapon sa paglambo.

Himua kining sitwasyon nga usa ka oportunidad. Mahimo nga wala ka makahibalo niini, apan posible nga adunay uban nga mga tsansa nga naghulat kanimo dinhi nga kompanya. Uban sa taas nga pagpasensiya ug positibo nga kinaiya, sulayi nga mogawas ka sa imong “comfort zone” ug hatagi ang imong kaugalingon sa higayon nga ma-reach out ang ubang mga empleyado. Samtang nagpalambo ka sa bag-ong panaghigalaay tingali, diha sa human relations mahimo nimong madiskobrehan ang mga wala pa nigawas nimo nga mga potensyal. Sa ingon, makasinati og pagsugod sa mas makahuloganon nga kinabuhi. Nan, kini nga lihok mahimo nga usa ka katumanan sa imong gihisgutan ang pagbutang sa Ginoo sa sentro sa imong trabaho ug dili lamang sa pagbaton og materyal nga kahupayan o sa pagtagbaw sa imong kaugalingong interes. And once you become God-centered, becoming “other-centered” likewise takes place. Sa laing bahin, unsa ang imong matampo sa kompanya aron molambo kini? Ipaambit ang imong expertise. Malay mo, basin mahimo ka nga usa diay ka blessing alang sa kompanya. Salig lang tungod ang Ginoo nagalihok sa imong kinabuhi. Huna-hunaa nga ang imong trabaho dinha usa ka calling ug tinubdan sa imong pagkabalaan.

Mahimong dili nimo masabtan ang tanan karon, apan sa ulahi, nagatuo ako, nga malamdagan ra ka, sa kaugalingong panahon ug kaugalingong paagi sa Diyos. Ug dinha na nimo ma realize nga ang tanang panghitabo Iya kining gasa ug dili gyud sayang ang mga panahon nga naa ka dinha sa kompanya, busa, angay lang nga magmapasalamaton ka Kaniya.

God bless you more.
Ate Emz