Prayer Moves Mountains

Dear Ate Emz,

Sa akong kasinatian makaingon ako nga ang mga problema ug pagsulay sa kinabuhi temporaryo lamang ug dili angayng kabalak-an kay duna kini kinutuban. Tuguti ako nga ipaambit ang usa ka higayon sa akong paglawig aning kalibutan.

Akong pagtoo nga ang akong gipas-an nga suliran wala na gyud katapusan. Lisud sa akong kabahin kay lagi simple lang ang among pagpamuyo nga walay igong katakos sa paghatag og pagtagad sa galastoson. Mga panginahanglanong pinansiyal tungod wala akoy permanenteng trabaho.

Pipila lamang kini sa akong mga suliran nga panglantaw sa uban gamay lamang apan pigado na para nako kay lagi walay kapanguha-an. Naulaw ko sa akong mga ginikanan kay nagsalig pa ako sa ilaha nga kung buot huna-hunaon ako na ang angayang mutabang kanila. Bisan pa niana wala akoy nadungog kanila. Hinuon wala man sab ako nagpaka gahi ug nagpabadlong kanila.

Milabay ang panahon sa akong pagpang apply ug maski unsang trabaho nga ma sudlan anaay oppurtunity nga miabot. Hasta nakong lipaya kay nadawat ako. Delivery/messenger sa usa ka pribadong buhatan. Natubag ang akong mga tinguha nga bisan sa gamayng ka haruhay. Ang Ginoong Dios wala nagpaka buta ug bungol sa mga nanginahanglan. Gamayng pag-antos ug pailob lamang ug pagtagad, Iya kining ihatag.

Daghang salamat sa higayon nga ako nakapaambit niining kasinatian.

Nagmatinahuron,
MARLON

* * * * * *

Dear MARLON,

Ang tao, habang may buhay, may pag-asa. Bisan unsa pa kabug-at ang mga gipas-an, sama sa imong giingon, ANG GINOO WALA GYUD NATULOG!

Sa ako nang kanunay mahisgutan, ang tanan nato nga mga pag-ampo, ginatubag gyud sa Gino-o. Ang Iyang tubag mao ang, OO, DILI, ug HULAT usa. Sa imong kabahin, murag Iyaha usa ka gipahulat. Tingali naa pa Siya’y gustong ipabuhat kanimo o di kaha naa pa Siya’y gusto nga imong makat-onan, mo uswag pa ang imong pagkatawo. Basin gusto pa sa Ginoo nga makat-on ka sa pagpailob ug pagpasensiya.

Kung imong namatikdan, murag gisukod gyud sa Ginoo kung asa kutob ang imong pagpasensiya, nga wala gyud ka nag-give up sa pagpangita og trabaho, ug sa imong pagsalig Kaniya nga dili gyud ka Niya pasagdan. Tinuod, sa akong panglantaw, imoha gyud napamatud-an nga ang pagsalig sa Iyaha, ang pagpailob, ug ang pagpasensiya, magmabungahon gyud! Mao nga sa katapusan, gigasahan ka og trabaho. Nagtuo sab ako nga ang imong mga ginikanan, sa hilom, naga-ampo sab nga makakita gyud ka og trabaho. Nahibalo ka ba nga ang mga pag-ampo sa atong mga ginikanan makapalumo gyud sa kasing-kasing sa Ginoo? His love, mercy and compassion is easily granted kung mga parents na ang maghangyo. Kanunay gyud ka magpasalamat sa Ginoo nga naa ang imong mga ginikanan nga sa ilahang “paghilom” niduol lang pud sila Kaniya alang sa imohang kalampusan.

Tinuod, ang tanan lumalabay lamang, apil na ang tanang kalisud nga atong masinati. Atong hinumdoman nga ang kinabuhi sama sa mga misteryo sa rosaryo…naay JOYFUL, SORROWFUL, GLORIOUS ug LUMINOUS. Ug sumala pa… LIFE IS NOT A PROBLEM TO BE SOLVED BUT A MYSTERY TO BE LIVED! Mao nga padayon lang gyud kita sa atong paglawig aning kalibutan, nga puno sa pagsalig sa kabubut-on sa Ginoo kay nahibalo Siya kung unsay maayo para sa atoa. Kanunay lang gyud kita naka ANCHOR sa Iya…dili gyud kita masaag sa atong dalan, bisan unsa pa kini ka batohon ug liko-liko. Mohatag gyud ang Ginoo og mga timailhan sa dalan aron ato kining sundan. Naa ang Iyang mga balaan nga pulong sa Bibliya, naa ang mga tao nga Iyang ipadala nga mogiya kanato, ang atong mga kasinatian nga mohatag og mga pagtulon-an. Dili gyud nato undangan ang PAG-AMPO. Sama sa dugo nga modagayday sa atong mga ugat aron kita mabuhi, ang pag-ampo mao sab ang dalan kung asa modagayday ang gasa sa Ginoo nga mao ang mag-amuma sa atong espirituhanong kinabuhi.

Kasamtangan nga naa kay trabaho, buhata kini nga imong MISYON. Ihalad sa Ginoo ang tanang sakripisyo, kalipay ug mga pagsulay dala niini, agi pasalamat ug pagdayeg sa Iyang paghigugma ug pag-amuma kanimo. Hinaot nga kini makahatag og makahuloganon nga kinabuhi alang kanimo.

God bless you more.
Ate Emz