Pagpangandam, Makaluwas Panahon Sa Katalagman!

Ang San Pedro Cathedral Parish Youth Apostolate (SPC-PYA), pinaagi sa namugnang Parish Disaster Action Response Team (PDART) nagpahigayon og usa ka panagtapok sa mga kabatan-onan niaadtong Agosto 27, 2022, sa Social Hall sulod sa San Pedro Cathedral Parish.

Tungod kasagaran sa mga lumolupyo sa parokya anaa sa “fire prone areas”, ug daplin sa dagat ug sapa gipahigayon kining seminar sa pagpangandam sa mga posibleng kalamidad nga mamahimong mahitabo sa umaabot nga panahon.

Ang nangulo sa morning session sa seminar naggikan sa Bureau of Fire Protection nga mao si FO2 John Paul Limjap duyog sa iyang mga kaubanan nga nagpaambit sa mga mosunod: Disaster Preparedness Introduction, BLS-CPR, Fire Safety Awareness, ug Fire Extinguisher Familiarization. Gihatagan usab nila ug higayon ang mga batan-ong partisipante nga makasulay sa paggamit sa fire extinguisher. Samtang sa hapon nga sesyon, si Mr. Roseller J. Seno nga gikan sa Davao Raven Firefighters Inc. usab ang nagpahigayon sa pagtudlo sa musunod nga topic: “Fire PPE, Equipment, and Vehicle Familiarization.”

Mapasalamaton kaayo ang mga batan-on sa unum ka Zona nga nakasinati sa maong kalihukan, bitbit nila ang dugang kahibalo sa ilang pagpama-uli alang sa pamilya ug katilingban. (Lovella Grace Brazil / Flora Jane Lodripas – SPC PYA)