Pagkapiniyalan

Ika-25 nga Domingo sa Ordinaryong Panahon (September 18, 2022)
Amos 8:4-7 | Psalms 113:1-2, 4-6, 7-8 | 1 Timothy 2:1-8 | Luke 16:1-13 • Or Luke 16:10-13

Ang atong Ebanghelyo niining ika-kawhaag lima nga Dominggo sulod sa Ordinaryong panahon naghisgot, nagpahinumdom, ug naghatag kanato sa panig-ingnan ni Kristo nga mga maayong piniyalan sa iyang mga binuhat ug sa iyang katawhan. Misalig gayod ang Dios kanato bisan pa man sa atong mga kakulangan nga nabuhat diha sa pagpadayon sa misyon sa kinabuhi isip iyang mga piniyalan.

Diha sa unang pagbasa sa sulat ni propeta Amos, isip piniyalan sa Dios mipahinumdom kini kanato nga dili nato angay hikawan ang mga kabus sa kung unsay anaa kanila, hinuon ato silang agnihon ug tabangan sa mga butang nga makapahimoot ug makapahiduol kanila sa Dios. Ang paghigugma ug pag-atiman sa labing nanginahanglan natong mga kaigsoonan maoy makapahimuot gayod sa Dios.

Si San Pablo diha sa ikaduhang pagbasa sa iyang unang sulat ngadto kang Timoteo, mipahinumdom usab kanato nga isip piniyalan sa Dios ang pag-ampo ug mga pagpasalamat kinahanglan pagahimoon matag adlaw aron magkinabuhi kita nga Diosnon sa tanang paagi, ug kini magagiya kanato diha sa dalan pa-ingon sa gingharian sa Dios. Maningkamot kita nga huptan nato ang mga bililhong butang sa atong kinabuhi ug tabangan kadtong mga tinamay ug gidaug-daog natong mga igsoon, ug dili ang mga butang nga maoy makapasigarbo kanato ug makapahilayo kanato sa ubang tawo ug sa Dios.

Bisan sa kadaghang mga kasinatian nga atong nahiagoman sa atong kinabuhi, maningkamot kitang magmalahutayon ug magmakanunayon nga mohimo sa misyon nga gitagana sa Dios kanato taliwala sa mga pagsulay ug kasakit. Dili usab unta angay nga pahimuslan ang mga taong nag antus sa kalisod ilabi na kadtong mga ka-igsoonan natong kabus. Maninguha kita nga magdumili sa pag-angkon sa mga butang nga dili atoa. Kinahanglan natong ipaambit ngadto sa uban kung unsay gihatag ug gisalig sa Dios kanato kay nasayod kita nga ang matag usa kanato piniyalan lamang niining kalibutana. (Bro. Julius Lugay)