Pag-amuma sa Kinaiyahan Isip mga Piniyalan

Dili ikalimod ang kapaspas sa kabag-ohan sa atong kinaiyahan. Kini tungod sa padayon nga nagkagrabe nga climate change. Kung inyong nabasa o nakita sa mga balita, makahadlok kaayo ang epekto niining maong suliran. Sama na lamang sa nahitabo karon sa nasod Tsina kung asa hapit na mauga ang isa sa pinakadako nga sapa nga mao ang Yangtze river, nangauga ang mga humayan, nangamatay ang mga kaumahan tungod sa grabeng kainit. Sa Europa, mga patay nga isda mitungha sa mga kasapaan, sobrang kainit nga nagresulta sa mga wildfires.

Kita isip mga piniyalan, gitagaan og katungdanan nga ampingan ang kinaiyahan. Dungan sa bag-ohay lang nga World Day of Prayer for the Care of Creation, ang mga nagkalain laing ministriya sa San Alfonso Ma. De Ligouri Parish dungan sa kura paroko nga mao si Rev. Father Jemasol “Jojo” Ortiz nagpahigayon og Tree Planting Activities, adlawng Sabado Septyembre 3, 2022 sa taas nga bahin likod mismo sa gihimutangan sa parokya. Mga miyembro sa Lectors, Commentators, Choir and Psalmists o LCCP, mga Pangulo sa Katilingban o PSK, mga miyembro sa Parish Youth Apostolate o PYA nagkahiusa alang sa kaayuhan sa atong kinaiyahan.

Kini nga aktibidad usa lamang sa daghang pamaagi nga atong mahimo tungod kitang tanan adunay katungdanan nga ampingan ang kinaiyahan isip mga piniyalan. Isa lang ang atong puluy-anan nga mao ang kalibutan ug angay gyud nato kining protektahan una pa maulahi ang tanan. (Jomar Earl Narciso, San Alfonso Parish SocCom)