Kon aduna kitay Pagtoo diha sa Dios

Ika-27 nga Domingo sa Ordinaryong Panahon (October 2, 2022)
Habakkuk 1:2-3; 2:2-4 / Psalms 95:1-2, 6-7, 8-9 / 2 Timothy 1:6-8, 13-14 / Luke 17:5-10

Ang pagtoo usa ka kinaiya sa pagsalig sa presensiya sa Dios. Ang pagtoo mao ang kaabli sa tanan nga gipadayag sa Dios, buhat, ug imbitasyon. Ang pagtoo mao ang masaligon nga kinaiya ngadto sa Dios nga maoy tinubdan sa tanan nga anaa kanato. Diha sa atong Ebanghelyo karong Dominggoha ang mga tinun-an sa atong Ginoong Jesukristo mihangyo Kaniya sa pagdugang sa ilang pagtoo. Kon ato kining lantawon diha sa tawhanong reyalidad kini usa ka kamatuoran nga naghulagway sa atong pagka-may-kinutuban. Atong makita ang atong kaugalingon kon unsa kita kahuyang, kagahi ug ulo, kadali malimot sa kaayo nga nahimo sa uban kanato.

Kon ato pa gayod nga palawuman ang atong pagpamalandong, nagkinahanglan kita ug kasaligan nga mas labaw pa kay kanato, tungod kay ang kamatuoran dali kitang masayop, ug ang atong paghukom tali sa pagbuhat ug maayo, dili nato himoon apan mobuhat hinoon sa dautan nga dili nato gusto nga buhaton. Ang pagtoo sa Dios maoy atong kasigurohan nga maglakaw kita diha sa kamatuoran ug katarong.

Apan kining maong pagtoo nga atong nadawat gikan sa Dios usa ka gasa. Dili lamang nato kini tipigan diha sa atong kaugalingon apan kinahanglan nato kini nga ipadayag ngadto sa uban. Ang gasa sa pagtoo sama sa usa ka lampara nga atong gidagkutan ato gayod nga ibutang sa ibabaw aron makita ang kahayag niini, ug malamdagan ang anaa sa mangitngit.

Busa ang gipangayo sa mga Apostoles nga dugangan ang ilang pagtoo mao usab ang atong hangyo sa atong Ginoo nga dugangan ang atong pagtoo aron makahimo kita sa gusto nga ipahimo sa Dios kanato. Ang pagtoo maoy atong iwag sa dalan nga atong gipanaw paingon ngadto sa gisaad nga gingharian sa Dios.

Sa katapusan, ang atong paghimo sa kabubut-on sa Dios diha sa iyang parasan, wala lamang nagpadayag kung unsa ang gikinahanglan apan nagkinahanglan kini sa tibuok pagtugyan sa kaugalingon. Sama sa katapusan nga bahin diha sa atong Ebanghelyo nga nag-ingon “Mga ulipon kami nga dili takus; nagbuhat lamang kami sa angay namong buhaton.” Tungod kay ang kamatuoran makahimo pa kita sa mga kahibulungan ug dagkong mga butang kon anaa kanato ang pagtoo nga sama kadako sa liso sa mustasa, ang pagtoo nga makapabalhin sa bungtod ngadto sa dagat. Kini ang atong gikinahanglan nga klase sa pagtoo, atong ibutang ang tanan nga pagsalig ngadto sa atong makagagahom nga Dios, ug mosalig sa tanan niyang gipadayag ug kamatuoran. (Bro. Soren Abellanosa)