Katekista sa Malabog: Matinud-anon sa Pagtoo

76 ka mga katekista inubanan sa ilang PSP Coordinator nga si Jeaneth Arañez ang mitambong sa Launching sa Catechetical Month sa San Roque Parish, Malabog niadtong Septyembre 4,2022 sa alas 6 sa buntag. Gisugdan kini sa usa ka misa nga gipangulohan ni Father Arnold Balaquinto. Human sa iyang homiliya, giampoan ug gibenditahan ni Fr. Arnold ang mga katekista. Sa alas 8:30 sa buntag didto sa Bag-ong seminar house, sila Sr. Terry Bitas, TDM ug Sr. Maria Blesilda Divino, OSB naghatag ug pagpalawom sa mga katekista bahin sa “PAGKAMATINUD-ANON SA PAGTOO”.

Nindot ang pagpasabot ni Sr. Maria sa matag sona. Ang matag usa nagpaambit sa ilang kasinatian kalabot sa tema. Daghan ang natandog sa matag pagpaambit ug aduna pa gani’y nakahilak ug duna usab nalipay kay sukad pa sa pandemic karon pa sila nakatapok pagbalik. Pagkahapon nakighimamat si Fr. Arnold kanila ug gibasa ang bagong pahibalo nga gikan sa opisina sa Arsobispo mahitungod sa pagpasabot sa pagwagtang sa pagbayad sa misa sa patay ug sa uban pang mga pahibalo sa mga schedule sa mga misa sa matag sona. Dako ang pasalamat ni Fr. Arnold sa mga katekista nga miadto sa parokya aron makaapil sa maong panagtapok ug nagpasalamat siya sa makanunayong pagsuporta sa mga katekista ngadto sa simbahan.

Matod pa ni Sis. Emilita Cruzada gikan sa GKK Candelaria Sona 10 dako iyang pasalamat nga nakatambong siya sa maong programa kay nakahatag kini ug kalig-on sa iyang pagtoo sa Ginoo nga magpadayon sa pagpangalagad isip katekista sa kapilya ug sa simbahan. (Imelda Overiz)