Birhen sa Kasilak, Tagbao San Roque Parish, Malabog 40 Anyos Na

Ang kapilya nga anaa nahimutang sa Siao, Tagbao, uban sa ilang patron nga mao ang Birhen sa Kasilak, bag-ohay lamang gayud nga nahimong sakop sa parokya sa San Roque, Malabog. Tungod sa gilayo-on sa lugar, dili gayod tiaw ang pagbisita dinhi. Duha hangtud sa tulo ka oras ang byahe, diin adunay tulo ka mga dagkong sapa ang imong labangon. Apan wala kini giisip nga babag sa mga parokyano nga gusto makig himamat sa mga bag-ong katilingban.

Niadtong Septyembre 9, 2022 mao ang ika-40 nga Kapistahan sa Birhen sa Kasilak- Tagbao, uban sa tema: “BIRHEN SA KASILAK SUMBANAN SA HIYAS SA PAGKAMAAYONG PINIYALAN DIHA SA IYANG PAGKAMASINUGTANON SA KABUBUT-ON SA AMAHAN.” Ang unang higayon nga sila nag saulog og Kapistahan ubos sa pag dumala sa bag-o nilang parokya.

Uban ni Fr. Arnold Balaquinto, kura paroko, mibyahe ang mga parokyano sakay sa usa ka dump truck. Sa maong byahe, anaa ang kahadlok og kakuyaw, apan sila puno gihapon sa kalipay kay uban man ang Dios kanila.

Human makapahuway sa taas nga byahe, gisugdan na dayon ang Santos nga Misa. Sa homiliya ni Fr. Arnold, iyang gipaambit ang pagkamilagroso sa Birhen sa Kasilak nga kini nagpabiling lig-on bisan paman sa mga dili maayong panghitabo. Iya usab gipasalamatan ang mga bisita, miyembro, og ang mga GSL nga gipangulohan ni Bro. Marcial Dosmanos, PSK, kinsa nagpaluyo sa maong kalampusan.

Human sa Santos nga Misa, nagpakabusog ang tanan dili lamang sa pagkaon, apan ingon man usab sa katawa, tungod sa mga paglingaw-lingaw sama sa basketball.

Sa atong mga pagpaningkamot diha sa atong pagsunod kang Kristo, kita makasinati og kalisdanan. Apan sa laing bahin, kini usab maghatag kanato og kalipay tungod sa atong mga kasinatian nga daw bililhon pa sa bulawan. Kung kita makahimo lamang sa paglantaw sa maayong butang, dili na nato kanunay mapanumbalingan ang mga kalisdanan. Sama sa mga bisita nga nihalad sa ilang panahon, sila nakasaksi sa kaanindot nga lugar nga bisan sa ilang imahinasyon, wala gayud nila damha. Ingon man usab sa katilingban nga nagpaambit sa ilang kaugalingon diha sa pagpangilabot sa pagpangandam sa usa sa mga espesyal kaayo nga selebrasyon ug kana mao ang kapistahan, ang pagpasalamat sa Kahitas-an sa laing tuig na usab nga pag-uban kanila.

Sa atong adlaw-adlaw nga kinabuhi, kita unta makahibalo sa pagbaton og igong kalig-on sa atong kasing-kasing og huna-huna diha sa pagtubag sa atong tagsa-tagsa ka mga tawag. Sama sa GKK sa Birhen sa Kasilak, nagpabiling lig-on isip usa mga piniyalan taliwala paman sa mga hagit og pagsulay.

Sa kanunay, Dalaygon ang Dios!

(Jozeil Comapas Crodua, Youth SocCom)