“Ang Tawong Mapasalamaton, Malipayon”

Ang pagsaulog sa kapistahan sa matag kapilya usa ka pagpadayag sa pagpasalamat sa Ginoo. Atong masud-ong ang panaghiusa nga makahatag ug kalipay ug gugma nga ipadayag pinaagi sa buhat og presensya nga maoy mag dasig kanato nga mopadayon bisan paman sa tagsa-tagsa nato nga mga kalisdanan.

Kini ang hulagway nga atong makita niadtong ika-28 sa Agosto 2022 atol sa pagsaulog sa kapistahan ni Sr. San Agustin sa Sitio Polocon uban sa tema nga “Sr. San Agustin Sumbanan sa Tiunay nga Pagkapiniyalan”. Ma batan-on man o hamtong, miyembro man o pangulo, nagkahiusa sa pagpangilabot sa dili lang napulo o kawhaa`g lima ka tuig, apan singkwenta katuig nga kasumaran sa ilang kapilya uban sa pangama ni Sr. San Agustin.

Alas dyes sa buntag gisugdan ang Santos nga Misa nga gipangulohan ni Father Arnold Balaquinto, kura paroko sa San Roque Parish. Buot unta ni Fr. Arnold nga ang taga Sitio Polocon nga si Fr. Ronald “Dodong” Arcillas maoy mangulo sa misa apan ilang nakasabutan nga si Fr. Dodong ang muhatag ug pamalandong. Panahon sa pamalandong iyang gipasalamatan ang kagahapon, ang karon og ang puhon. Lakip sa kagahapon mao ang mga niaging mga kaparian og GSL’s nga nagdumala sa kapilya. Ang karon, nga mao ang mga kasamtangang miyembro sa katilingban, GSL’s og kura paroko nga sa kanunay andam mo suporta. Ingon man usab ang puhon, ang mga batan-on nga maoy mosunod nga modumala ugma puhon. Kana ang hinungdan nga dili kita angayng mabalaka sa puhon, kay adunay mga batan-on nga abli ang kasing-kasing bisan paman sa linghod nila nga mga pangidaron. Labaw sa tanan, ang Ginoo, Kinsa nagpiyal kanato babaw niining kalibutan. Matud ni Fr. Dodong, “Ang tawong mapasalamaton, malipayon”. Og tiunay gayud nga malipayon ang tanan, sanglit si Fr. Dodong produkto gayod sa maong katilingban.

Human sa Santos nga Misa, siyam ka mga bata ang nakadawat sa Sakramento sa Bunyag. Sa maong selebrasyon anaa usab si Father Vicente Rey Duron, SSP uban sa mga Davao Vocation Promoters, kinsa nakighimamat sa mga batan-on nga anaa didto. Anaa usab ang mga PPC members og ubang mga pangulo sa parokya kinsa mipadayag sa ilang suporta sa katilingban. Dayon nga gisaluhan sa tanan ang mga graysa nga anaa sa ilang talagkan-anan.

Wala pa diha nahuman ang selebrasyon, aduna usab mga gipahigayon nga pag lingaw-lingaw sa tradisyonal nga paagi. Sama sa pagkatkat sa kawayan diin anaa ang dakong ganti sa tumoy niini, nakapiring nga pag dakop sa baktin, pagpailog og mga maayohon, raffle og uban pa. Wala usab nagpaulahi ang Staff sa parokya og ang mga GSL sa pagsalmot sa dula nga basketball. Kining tanan nahitabo tungod sa usa lamang ka tumong og kana mao ang malipay.

“Salamat sa Ginoo, Salamat sa atong Kura Paroko, salamat usab sa atong produkto nga pari, sa mga GSL, miyembro og mga bisita, salamat. Ang kanhi 13 ka bubong, karon 87 na. Daghang Salamat!”, mensahe ni Bro. Edgardo Pocong, PSK.

Sa maski asa nga aspeto sa kinabuhi, kita gigasahan sa Ginoo sa daghan kaayo nga paagi. Sama sa Sr. San Agustin – Polocon, sila gigasahan na sa ilang Golden Anniversary. Og sama sa bulawan, ang ilang kadasig sa pagpangalagad magpadayong mosidlak hangtud sa umaabot nga puhon.

Sa Kanunay, Dalaygon ang Dios!

(Jozeil Comapas Crodua, Youth SocCom | Photos by Imelda Overiz)