Ang Grasya sa Dios, Kinabuhi

Ika-24 nga Domingo sa Ordinaryong Panahon (September 11, 2022)
Exodus 32:7-11, 13-14 / Psalms 51:3-4, 12-13, 17, 19 / 1 Timothy 1:12-17 / Luke 15:1-32

Ang pagpuyo diha sa grasya sa Dios maoy magdalag kalipay ug kaluwasan. Mao kini kanunay ang hagit sa Kristohanong pagkinabuhi; ang pagtahan sa kinabuhi ngadto sa mga kamot sa Dios.

Ang atong Ebanghelyo karong Dominggoha nagsaysay sa tulo ka mga sambingay diin adunay managsamang pagkahan-ay. Gihulagway sa sambingay nga adunay nawala, gipangita, ug dakong kalipay tungod nakaplagan. Diha sa katapusan niini gihulagway nga adunay mas dakong kalipay kon ang usa ka makasasala mobalik ngadto sa Dios. Kon ugaling mahibulag kita sa grasya sa Dios ang sangputanan mao gayod ang pagkawala.

Atong lantawon ang atong kaugalingong kasinatian nga kon makasala kita ang atong “inclination” o puruhan, mobulag sa katilingban ug kita mahisalaag diha sa atong panaw nga unta uban sa atong isigkatawo ug ilabina sa atong Dios. Ang nahitabo diha sa atong Ebanghelyo nga sa dihang ang kamanghuran nga anak nga lalaki nagpalayo sa iyang amahan nagsugod siya ug kawala ug nahimong misirabli ang iyang kinabuhi. Nahimong walay tumong ang iyang kinabuhi, kini nga hulagway usa ka timailhan nga diha sa Dios anaa ang kalipay ug kapuno sa kaluwasan, anaa ang direksyon sa kinabuhi nga maghatag kanato sa tinuoray nga kalipay ug kahimayaan.

Sa katapusan, ang makanunayon natong koneksyon sa Dios maoy iwag sa atong dalan paingon ngadto sa gingharian nga gisaad ni Kristo Hesus kanato. Kon aduna kitay lawom nga relasyon sa Dios kini magdala kanato ngadto sa kinabuhi. Ang kinabuhi nga adunay kalinaw ug kahamugaway. Ato gayod kining paningkamotan nga makighiusa kita sa Dios nga maoy tinubdan sa tanang kalipay, ug muhatag sa grasya nga muagni kanato sa pagkinabuhi subay sa iyang kabubot-on.

Ang kaluwasan nga gitanyag sa Dios kanato dili makuha sa atong kaugalingong paningkamot apan kini lihok sa Dios diha sa atong tagsa-tagsa ka kinabuhi. Ang Dios dili gusto nga adunay usa ka kalag nga mawala apan malipay Siya pag-ayo kon adunay usa ka makasasala nga maghinulsol ug mobalik ngadto Kaniya. Atong pamalandongan nga ang grasya sa Dios anaa gayod kanunay diha sa atong kinabuhi apan kini nakadepende kon unsa kita kaabli sa Iyang grasya. (Bro. Soren Abellanosa)