St. James Parish Celebrates Diamond Jubilee

Nagsaulog sa ika-60 ka tuig nga Anibersaryo o Hubileo ang Parokya ni Santiago Apostol sa Bunawan niadtong Hulyo 25, 2022 gikan sa pagkatukod niini niadtong tuig 1962.

Ang maong selebrasyon gipangulohan sa atong halangdon nga Arsobispo sa Davao nga mao si Most Rev. Romulo G. Valles, D.D.. Ang maong selebrasyon gipangandaman sa kura-paroko nga si Reberendo Padre Rolando O. Mandreza duyog sa mga volunteers sa parokya ug nagkadaiyang mga GKK. Panahon sa Pontifical Mass duna sab mga kaparian gikan sa nagkalain-laing mga parokya nga kabahin sa saysenta ka tuig nga panaw sa parokya ug kauban ang silingan nga mga kaparian sa Cavanis.

Puno gayud sa kalipay nga nagpahayag sa iyang gibati ang Arsobispo tungod kay nakita niya nga puno ug tawo ang maong simbahan ug maanindot kaayo ang dekorasyon sa altar nga gipangandaman sa mga PPC members, staff ug mga GKK servant leaders.

“Mura kita’g Earthen Vessels nga dali mabuak pero we are allowed, given the beautiful opportunity to hold the treasure; ang bahandi sa pagtoo” sulti sa atong Arsobispo sa iyang homilya ngadto sa mga parokyanong malipayong nanimba. Iyang gipasabot nga ang tanan sama ra gayud sa yuta apan gitagaan kita’g grasya sa Ginoo nga mao ang bahandi sa pagtoo.

Haom kining mga pulonga sa maong tema nga “Ika – 60 ka tuig sa grasya ug buhing pagtoo: Saulogon, Pagkapiniyalan Palig-onon”. Maong nindot nga huptan gayod ang atong pagtoo sa Ginoo kay Siya dako ug pagsalig kanato ug aron kita mahisama kang Sr. Santiago Apostol nga nakatagamtam sa maong bahandi. Dugang pa niini, nalipay usab ang kura paroko nga si Reberendo Padre Rolando O. Mandreza, sa nahimong malampusong selebrasyon sa kapistahan sa maong patron.

Human sa solemneng selebrasyon, misunod ang PISTA SA NAYON diin bibong giapilan sa mga parokyano ang mga padula ug gipasundayag sa matag sona ang ilang gibuhat nga payag. Misalmot ang walo ka sona sa mga padula nga giandam sa mga batan-on ug nagpakita sa ilang mga talento ang mga GKK Servant Leaders. Sa maong aktibidad gideklara nga daog sa pagbuhat sa payag ang Sona 5.

Taliwala sa mga hagit karon nga atoang nasinati, padayon kitang mangamuyo karon sa atong mahal nga patron Sr. Santiago Apostol. Uban sa iyang mga giya padayon kita nga magpuyo sa panaghinigugmaay ug panaghiusa kay ang Ginoo migasa kanato kanununay Ug lig-on nga katilingban. Atong ipalambo ang gasa sa pagtoo pinaagi sa pangaliya ug pangama ni Sr. Santiago Apostol nga atong patron. (Apple Jean C. Cabatuan | SJAP SocCom)