Pagpalambo sa pagtoo

(Excerpt from the Homily of Most Reverend Romulo G. Valles, D.D., on the 38th Parochial Fiesta Celebration of San Roque Parish in Malabog, Davao City last August 16, 2022.)

Busa mga isguon, ni-ining piyesta karon, duna kitay duha ka leksyon nga atong makuha alang sa pag-uswag pa, pagpanindot, pagkupot, pagkapiniyalan sa atong pagtuo. Pagtuo nga atong puy-an sa daghang mga lihok sa atong simbahan. Ipakita nato ang tanang lihok nato, giniyahan sa atong pagtuo sa Dios.

Ang una, bantayan nato, nga ang tawo adunay kanunay nga temptasyon nga mahambugero. Ang tawo anaa nato kanunay, ang temptasyon nga mabuhi ta nga walay Dios. Mao nay ingon sa unang pagbasa ni Propeta Ezekiel, ni-ingon ang Ginoo pinaagi ni Ezekiel, pastilan ning mga tawhana nagkahambugero kay daw pwede sila mabuhi nga walay Dios. Busa sa atong pagsaulog sa piyesta karon, bantayan nato nga magpabilin ang pagkabata, ang pagkamapaubsanon. To truly trust, kanunay isalig nato tanan sa Ginoo nga ang atong Ginoo murag guiding force. Siya ang guide. Siya ang inspiration sa tanan natong lihok sa atong kinabuhi. Kon musugod na kita ug ingon nga mutambok man ang kabaw nga walay simba-simba, nah mao na ang sinugdanan sa atong kapildihan. Dili kay kanunay murag mirakolo nga mahulog ang bugas, mahulog ang kwarta, mahulog ang trabaho gikan sa langit apan sa pagpaningkamot nato ni-ining mga galamiton, mga kailangan sa kinabuhi, kanunay ang guiding light mao ang atong pagka-anak sa Dios. Pananglitan, ang inyong anak nahilayo aron makahuman ug college, kining anaka taga Malabog gyud, tigsimba gyud, iyang papa GKK leader, siya youth, iyang mama Catechist, bright man nakahuman ug college, na accountant dili lang sa Davao naka adto ug Makati dako nga kompanya ang gitrabahuan. Unya usa ka adlaw niana nay muingon niya “Miss, ikaw may dako ug ranggo sa kompanya, pwede nimo pirmahan ni?” “Sir, di man nako pwede pirmahan na!” “Ayaw kabalaka inig pirma nimo, anaa kay 20 million. Inig kahuman pa gyud ani, naa kay lain nga 20 million.” Ug kining taga-Malabog nga atua na sa Makati muingon “Sir, di ko mupirma ana kay binuang mana, bakak mana. Tinuod kwarta na, malipay si mama ug papa sa Malabog kay makapalit mi ug dungag nga yuta pero di ko ana kay kanang buhata di magdala nako sa tinuod nga kalipay sa kinabuhi.” Gasa sa pagtuo. Pagtuo nga atong kanunay gi-ampingan isip piniyalan nga maoy mugiya nato sa dalan sa kinabuhi, dato man o pobre. Apan dato o pobre kon dunay pagtuo, kita magmalipayon gyud nga anak sa Dios.

Ikaduha, gikan sa Ebanghelyo karon apan muingon ako, ang Ebanghelyo mao ang maayong Balita, muingon kita, mulukso ako sa Ebanghelyo, maayong balita mao nga ang Dios dinhi sa Santos nga Misa buot gyud makigsalo kanato. Ang pagkaon pan ug bino, mao ang lawas ug dugo. Pero atong hinumdoman uban sa example ni San Roque, nga atong Patron, makahuna-huna siguro kita nga ang Misa sa Katoliko, alang lang sa mga buotan, alang lang sa mga pari, alang lang sa mga active sa GKK, alang lang sa mga maayo, apan ang uban magpanukod, mabation, maulaw mutambong sa misa kay dili angayan. Kahibalo mo ingon atong Santo Papa, ang misa dili premyo sa mga santoson, sa mga aktibo, mga maayo sa katilingban. Dili na premyo apan ang misa mao ang pagkaon sa mga makasasala. Mga makasasala nga buot gipasabot, nag-aginod pa, naningkamot pa, buotan karon, tikasan ugma, buotan napud, marites pagka Martes, buotan napud, mamaligya ug boto inig eleksyon. Ingon ana ta. Si San Roque kahibaw kung unsa kita kahuyang mao nga ingon sa atong Santo Papa, sige lang dili kay ingon nga magsige ta ug pakasala pero ang Dios, tumang mapinanggaon nato, nga again and again and again, kita nga taga Malabog, malipayon Siya nga manimba kita. Iya kitang pakan-on aron ang atong gihuptan nga pagtoo, malig-on ug little by little, ginagmay lang, malig-on kita nga mga anak sa Dios.

Mga isguon, kining Hesus nga atong gisimba, kining Hesus nga gisimba ni San Roque, kining Hesus nga larawan sa Dios nga Amahan, grabe ang ilang kwentada, ingon gud Siya nga kon adunay usa ka taga Malabog nga mawala, usa lang, ako kamong biyaan kay akong gukdon, akong tawgon, akong pangitaon, akong luwason ang usa. Sa mata sa Dios bisan kita mga gahi ug ulo, bisan huyang kita, sa mata sa Ginoo, kining naghatag sa Iyang lawas ug dugo, each one of us labi na kadtong wala nagkadimao sa iyang pagkapiniyalan, Iyang adtuon, Iyang dawaton. Busa mga isguon, kining mga rasona sa atong pagsaulog karon labina sa Parokya nato sa Malabog usa ka annual, tinu-ig nga pagsaulog nga unta makapalig-on, makapatubo, makakuhit, makadasig sa atong pagtuo nga atong gihuptan sa laing-laing kahimtang nato sa kinabuhi. Apan sa ultimasumada unta kita mao ning pagtuo magdala kanato sa tinuod nga kalipay ug tinuod nga kauswagan. Busa, proud kita, malipayon kita, layo man o duol nga muanhi sa atong piyesta kay dili lang kita nagadayeg sa Dios ug kang Sr. San Roque apan nasayod kita nga kini dunay kalabutan sa matag-usa kanato diha sa atong pagpuyo sa atong pagtuo.

Mga igsuon, malipayong piyesta kaninyong tanan. Viva San Roque! Viva!