“Napari ko kay tungod gikaloy-an ako sa atong Ginoo”

Ang ordinasyon sa pagkapari usa ka tawag ug gasa gikan sa Dios. Ang balaod sa Canon sa Simbahang Katoliko nag-ingon nga ang pagkapari usa ka sagrado ug walay katapusang estado sa bokasyon ug dili kini usa lamang ka propesyon.

Niadtong Agosto 22 adlawng Lunes, si Reberendo Padre Ranebe Magallanes gi-ordinahan sa Parokya sa San Isidro Labrador, Catalunan Grande.

Tuod nga dili si Padre Ranebe ang kinaunhang pari nga naggikan sa parokya sa San Isidro apan siya ang pinakauna nga didto sa maong parokya giordinahan. Dakong garbo ug grasya kini alang sa mga parokyano sa Catalunan Grande tungod usa kanila ang gitagaan ug dakong tahas sa pag-alagad.

Diha sa gipaambit nga mensahe ni Padre Ranebe, siya miingon “Napari ako, dili tungod kay buotan ko, napari ako dili kay mapinanggaon ko, napari ako dli tungod kay gihigugma ako sa katawhan, napari ko kay tungod gikaloy-an ako sa atong Ginoo. Nalooy ang Ginoo kanako”. Dako ang iyahang pasalamat sa Ginoo nga mitawag kaniya sa pagkapari bisan pa og dli siya angayan atubangan sa Dios.

Photo by Brenda P. Milan

Sa ordinasyon sulod sa Santos nga Misa, atong makita ang usa ka sagradong panghitabo sa kinabuhi sa usa ka tawo nga nangandoy mamahimong pari ug mahisama sa Dios. Ang Obispo sa hilom nagtapion sa iyang mga kamot diha sa kandidato, aron paghangyo sa gahom sa Espiritu Santo diha sa tawo nga paga-ordinahan. Nasayran sab ang paghatag ni Padre Renebe sa iyang saad nga magmakugihon siya sa pagbuhat sa mga katungdanan isip usa ka pari sa Dios ug pagtahod ug pagsunod sa Obispo.

Ang pagkapari nga Katoliko, usa ka dakong bahin sa pagkapari ni Kristo ug nagsubay kini sa kasaysayan nga gigikanan niini sa napulog-duha ka mga Apostoles. Ang maong mga Apostoles mipili usab ug laing mga lalaki nga mopuli kanila ingon mga obispo sa Kristohanong katilingban. Ang mga Obispo usab mitudlo ug dugang pa nga mga pari sa pagdumala sa Eyukaristiya.

Ang bokasyon sa pagkapari tawag gikan sa Dios, mailhan ug masabtan nato kini gikan sa iyang kaugalingong kabubut-on. Sa diha nga ang Dios mipili og mga tawo, wala siya mitan-aw sa ilang pagkamakasasala. Duyog sa pamalandong ni Padre Ranebe sa iyang pagkapari, kita usab gipahinumdoman nga kitang tanan musalig sa grasya sa Dios lamang. (Bro. Julius Lugay)