Hiwi Nga Binuhatan

Dear Ate Emz,

Gusto lang nako i-share ang akong kasinatian bahin sa kinabuhi dinhi sa akong gina trabahoan. Usa ako ka regular nga empleyado ug very considerate ang akong Boss. Masinabtanon ug very kind hearted. Akoa lamang ipaambit nga diha sa akong pagpanarbaho very dedicated ug honest to goodness ako sa pagserbisyo. Professional akong approach sa work kay gusto ko nga orderly ug walay masulti akong mga kaubanan towards my attitude sa work. Wala lang ako maka uyon sa sistema kay nganong walay ngipon sa pagpatuman ug sanction kung ang usa ka empleyado makabuhat ug dili maayo. Aware ang management sa maong mga lapses apan walay gihimo nga disciplinary action nga aron mahatagan ug angayng lutos o warning ba kaha. Dili lamang kausa, duha o tulo, apan sa maka daghang higayon na. Dili ko na lang idetalye pero sa akong kabahin ug sa uban nakong mga kaubanan sa trabaho labaw na sa management nga iyang gi limbongan, dili gayud maayo.

Dili man sa ingon nga hugas kamay ako kay duna man sab koy mga kalapasan apan ginagmay ra ug tolerable. Sama sa akong gika-ingon nga sobra lang jud ka masinabtanon ug buotan kaayo ang Boss, nga bisan klaro na ang mga kalapasan, walay action kini. Nasayangan ako sa mga panghitabo kay mura ba ug gi tolerate lamang kini. Dili ko na makayang magpaka hilom. Sakto na ang akong mga nakitang hiwi sa akong kaubanan pero in fairness naa sab uban nga DINIYOS ang pagpanarbaho. Concerned lang ko sa kumpanya nga mi sweldo ug sakto apan kining tawhana walay uwaw ug konsensiya. Pasayloa ako kung naka ingon ako niini apan mao gayud kini ang kamatuoran. Swerte lang gyud nga dunay Boss nga dili mangtas, mapailubon ug taas ang pasensiya.

Sa pagka karon mahimong maka ikyas pa siya apan pag-abot sa panahon duna siyay dakong tulubagon kung kining hiwi nga binuhatan iyang padayunon.

Lubos nagpapasalamat,
JAO

* * * * * *

Dear JAO,

Usa sa mga konsiderasyon nga atong gilaoman samtang nangita kita og trabaho mao ang maayong working environment. Nanghinaot kita nga ang mga relasyon mahimong hapsay ug husto nga pamatasan sa trabaho ang naobserbahan ug gipatuman. Apan makapasubo, mahibal-an nga ang pipila nga mga working environments usa sa mga hagit sa mga empleyado nga labi ka partikular sa kini nga mga gawi.

Kini usa ka kamatuoran nga ang matag empleyado makig-uban o makigsandurot sa lainlaing mga indibidwal nga adunay lainlaing mga personalidad ug kinaiya. Ang matag usa nagdala sa iyang kaugalingon nga mga istorya/kasinatian sa kinabuhi, mga pangandoy, mga kahanas ug usahay apil na ang mga bagahe sama sa mga problema nga ilang giatubang.

Sa laing bahin, naay mga employers nga wala kaayo magtagad sa academic achievements o grado sa mga aplikante. Mas gihatagan nila og importansya ang mga mithi (values), kinaiya, ug disposisyon sa kinabuhi o partikular, sa trabaho. Para nila, ang mga teknikal nga kahibalo, matun-an ra pinaagi sa mga trainings, lectures, experience, etc.

Kung seryoso ka ug propesyonal sa imong trabaho, dali lang nimo makit-an ang usa ka empleyado nga wala magtrabaho sumala sa iyang job description o nagpraktis sa mga sumbanan sa pamatasan nga gitakda sa kumpanya. Sumala sa sitwasyon sa inyong kumpanya ilabi na sa imong Boss, magpasalamat ka nga naa kay amo nga “masinabtanon ug buotan”. Bisan pa niana, nahimutang nga kini hinuon murag usa ka weakness tungod kay kini giabusohan dili lamang niining partikular nga empleyado nga imong gipasabot, kondili sa uban usab, lakip na ang imong kaugalingon (bisag unsa ka gamay / tolerable and sayop nga binuhatan, sayop gyud gihapon kini). Busa, ang maong kalapasan sa imong Boss moresulta sa kakuwang sa sistema sa pagpatuman sa mga aksyong pagdisiplina sa mga nakasala nga empleyado.

Sa pagkakaron nadisturbo ka sa kini nga senaryo sa pagpanglimbong sa kompanya ug inomg gipahayag nga dili ka na magpabiling magpakahilom. Apan sa imong kabahin unsay imong nabuhat para maundang na ang sayop niining partikular nga empleyado? Ug unsa pa nga mga aksyon ang imong giplano nga buhaton? Uban sa imong gibutyag bahin sa imong kaugalingong “ginagmay ug tolerable” pa nga mga kalapasan, adunay kalagmitan nga dili ka kaatuohan sa paghatag sa gikinahanglan nga “fraternal correction” tungod kay ikaw usa usab kanila. Dili nimo mapugngan ang uban sa pagkomento sama sa… “kinsa ka aron matulid nako kung nakasala sab ka sa pagbuhat sa parehas nga butang?” Hinumdomi ang giingon sa Balaang Kasulatan, “ngano namatikdan nimo ang puling sa mata sa imong igsoon apan wala nimo tagda ang troso sa imong kaugalingong mata?” (Matt. 7:3)

Sa kini nga sitwasyon, ikaw gihagit sa pagsugod una sa imong kaugalingon, bisan pa unsa ka gamay ang imong ginakonsiderar nga imong kalapasan. Pagbalik ngadto sa Ginoo diha sa paghinulsol ug mangayo alang sa Iyang kapasayloan tungod kay dili pa ulahi ang tanan aron usbon ug tarong ang imong kaugalingon nga dalan. Dugang pa niini, sigurado nga ang imong maayong panig-ingnan mamatikdan ra sa uban, ug sa hinay-hinay mahimo ka nga usa ka makapabag-o nga presensya sa imong trabahoan. As what St. Paul says, “For you were once in darkness but now you are light in the Lord. Live as children of light for light produces every kind of goodness and righteousness and truth”. (Ephesians 5:8-9)

Hinaot nga unta buhat sa “fraternal correction”, pinaagi sa pagkamapahiubsanon ug paghigugma, mahimong makabaton ka og igo nga kaisog aron makapag dayalogo uban sa maong empleyado mahitungod sa imong obserbasyon ug ang panginahanglan sa pag-usab sa iyang dili maayo nga mga buhat. Ug dugang pa, pinaagi niini nga dayalogo mahimo nimong madiskobrehan ang mga rason o hinungdan luyo sa iyang mga sayop nga mga binuhatan. Niining paagiha, imong gisuspenso ang imong paghukom nga siya “walay uwaw ug konsensya.” Dinhi sab nimo mahimamat kung unsa iyang mga giagian sa kinabuhi ug makatabang ka sa iyang pagbag-o. Busa, sa ingon ani, makahatag mo ug hustisya sa kompanya nga nagahatag usab sa angay/sakto nga pasweldo sa mga empleyado niini. Labing importante, ayaw kalimot nga ubanan sa hingpit nga pag-ampo nga kining dayalogo mag-ani og positibo nga mga resulta.

Bahin sa management sa kumpanya alang sa pagdisiplina sa mga empleyado nga nakabuhat og mga paglimbong, subo man hunahunaon apan wala sa imong kontrol ang desisyon niini nga sa imong panglantaw kulang o “walay ngipon sa pagpatuman ug sanction”. Apan kung ikaw naay kaisog nga magdayalogo sab sa natungdang opisyal/manager, labing maayo. Sa makausa pa, ubanan sab kini nga katuyoan ug pag-ampo aron malamdagan ang tanan. Hoping and praying that the Holy Spirit will guide you on the right words to say and the right things to do.

God bless you more.
Ate Emz