Hagit sa Pagsaksi sa Gugma sa atong Ginoo

Tungod sa makita nga daghang kausaban ug kalamboan sa simbahan sa San Alfonso Maria de Ligouri nagmalipayon ang atong halandgon nga arsobispo sa Dabaw Most Rev. Romulo G. Valles, D.D. Sa iyang pamalandong niadtong Agosto 1, adlawng Lunes atol sa ika-20 nga kapistahan sa parokya, iyang gipaambit ang iyang panghinaot nga dili lang ang istruktura ang mulambo apan usab ang pagtoo sa mga katawhan nga naglakip sa simbahan. Ug tuod man usa sa daghang sumbanan si San Alfonso nga maoy patron sa parokya, ang iyang kadasig luyo sa iyang sakit nga pisikal naghatag kanato ug paglaom ug hagit nga mupadayon sa atong kinabuhi.

Kung sa kaniadto ang altar usa lamang ka gamayng lamesa karon milambo na gayod kini ug nahimong fixed. Sumala sa kaniadtong pamulong ni Abp. Valles, ang pinakalabing importante sa usa ka simbahan mao ang altar mao nga dako ang pasalamat sa mga parokyano diha sa kura nga si Rev. Fr. Jemasol “Jojo” Ortiz sa kadaghan sa iyang mga sugyot nga pamaagi aron matuman kining tanan.

Pipila ka mga activities for fund raising ang gipahitabo sama na lamang sa circus show kung diin daghan usab ang nalipay ug nahingangha.

Sa katapusan, sa mapadayunong mga paglambo sulod sa parokya, hagit usab sa mga parokyano ang mamahimong saksi sa dakong gugma sa atong Ginoo.