“Ayaw Kabalaka Ug Ikaw Mawad-An”

Layo man ug ulan-ulan daghan gihapon ang mga parokyano ug mga kaparian miduyog ug mitimbaya sa kapistahan ni Sr. San Roque niadtong Agosto 16, 2022. Gisaulog nga puno sa kalipay ang misa alang sa ika-38 nga kapistahan sa parokya uban sa Tema “Sr. San Roque: Sumbanan sa Tiunay nga Pagkapiniyalan.”

Nagsugod sa alas nwebe sa buntag ang Pontifical Mass nga gipangulohan sa atoang Arsobispo sa Davao, Most Rev. Romulo G. Valles D.D., diin sa iyang homiliya iyang gipunting nga ang parokya gipiyalan sa gasa sa pagtoo, diin maoy nagtultol ug nagadasig kanato labi na panahon sa Santos nga Misa.

Gi-awhag ni Obispo Valles ang katawhan nga unta dili mabalaka nga mawad-an o mohatag, tungod kay ang pagbuhat niana mao ang dakong gasa sa pagpangga sa Dios kanato tungod Kaniya man nag-gikan ang tanan ug nga Siya gihapon ang muhatag ug ganti.

Ubay-ubay sab ang mga katawhan nga gipasalamatan sa kura nga si Fr. Arnold Balaquinto, Kura Paroko sa Parokya sa Malabog, tungod sa mabulukon ug makahuluganon nga pagselebrar sa kapistahan. Dili mahurot ang iyang pasalamat tungod nakita niya ang bunga sa kahago labi na diha sa mga Parish Staff ug mga myembro sa Parish Pastoral Council.

Human sa santos nga misa misunod ang Sakramento sa Kumpirma dayon ang pagbendisyon sa bag-ong Seminar House sa likod sa simbahan. Panahon sa pagpangaon nagkatapok ang mga parokyano sa ilang mga purok nga nakahan-ay matag sona. Pagkahuman ug panga-on, gipadayon ang mga kalihukan sama sa Purok Contest w/ Food Display, San Roque Look-alike Contest, ug Original Song Composition alang kang Sr. San Roque ug ang Tiktok Challenge.

Pinaagi sa pangama ni Sr. San Roque, hinaot pa nga sa pagpadayon sa sangon sa misyon dili usab kita mabalaka nga mawad-an tungod sa pagpaambit sa atong gasa ngadto sa uban. VIVA SR. SAN ROQUE! (Evelyn Gallenero| GKK Sto. Niño – Maglipayan Soccom)