Youth Encounter Sa San Roque Parish

Nagmabungahon ang programang Youth Encounter sa San Roque Parish-Malabog niadtong July 23, 2022 nga gisalmutan sa 206 ka mga PSB gikan sa nagkadaiyang GKK nga nahisakop sa maong parokya.

Gisugdan ang maong programa pinaagi sa pagsaulog sa Santos nga Misa. Diin sa Homiliya ni Fr. Vic Rey Duron, SSP iyang giingon nga “Take that seed in order to grow and bear fruits”. Kita usab sama sa usa ka liso, motubo og molambo diha sa atong pagkakita kung maatiman lamang. Moabot ang panahon nga kita mamunga, og kana mao ang atong maayong mga buhat nga atong ikapaambit ngadto sa uban. Human sa Santos nga Misa dayon nga gipaila-ila ang mga Davao Vocation Promoters nga gipangulohan ni Rev. Fr. Ronald Arcillas. Lakip nga ilang gipaila ang ilang nagkadaiyang Ministriya, tumong og tinguha. Aduna usab nahitabo nga open forum, diin natubag ang mga pangutana nga nakapalibog sa panghuna-huna sa mga batan-on.

Human sa paniudto, naghatag og makabulohang pulong si Sis. Jennifer Arañez, PSP Coordinator nga nag punting sa “stewardship” kon pagkapiniyalan. Diin ang upat ka mga kinauyokan niini mao ang: identity, trust, gratitude ug charity/love. Kinsa ba kita diha sa atong adlaw-adlaw nga pagkinabuhi isip piniyalan sa Ginoo nga modumala sa mga butang babaw niining kalibutan. Batan-on adunay hiyas sa pagka mapasalamaton og pagka mahigugmaon. Kay isip usa ka Kristiyano, kinahanglan man nato nga mahigugma. Sa maong panagpulong, nahatagan og higayon ang mga batan-on nga makapamalandong og makapaambit niini. Usa sa mipaambit mao si Kiffer Kyn Joromat, batan-on gikan sa Zone 8, “Isip usa ka batan-on nga leader, kinahanglan nga selfless ka”, aduna gayo’y mga panahon nga kinahanglan nimong ipadaplin ang imong kaugalingon ug pilion ang kaayohan sa uban. Kini timaan lamang nga bisan sa atong linghod nga pangidaron nabati na gayod natu ang gugma sa Ginoo.

Mapasalamaton si Rev. Fr. Arnold Balaquinto, kura paroka sa tanan hilabi na sa mga batan-on nga misalmot sa pinasahi og nindot kaayo nga youth encounter, sanglit sa Archdiocese of Davao, kini ang unang nahitabo nga adunay Vocation Promoters nga mibisita sa Parokya. Iya usab nga gihagit ang matag usa nga magpadayon sa pag apil-apil sa mga kalihokan sa Parokya man, sona o kapilya. Sanglit sila gitawag nga GSL kon GKK Servant Leaders, sa kanunay sila gayud dapat ang manguna aron kini usab ang sundon sa ilang mga kaubanan.

Gitapos ang programa sa usa ka pag-ampo. Sa pagpangulo ni Ms. Jessel Cleopas, PYA Coordinator uban sa iyang core group, ang tanan nagtinabangay sa pagpanghipos, timaan nga sila nahiusa sa gugma sa Dios. Puno sa kalipay og kaalam nga namauli ang matag-usa uban sa panghinaot nga makita pa nila ang matag-usa sa mga mo sunod pa nga mga adlaw sa Ilang kinabuhi. (Jozeil Comapas Crodua, Zone 2 Youth SocCom)