Yanong Kinabuhi

Dear Ate Emz,

Sa atong kinabuhi adunay higayon nga kita sulayan. Klase-klaseng mga pagsulay nga atong maagian. Hinumdoman lang nato nga kining tanan lumalabay lamang ug sa matag problema dunay solusyon.

Kung bahandi pa lang ang mga suliran dato na unta ako apan maka dato sa aspeto nga ako nagmalaumon nga masulbad ang uban pinaagi sa pagpugong sa kaugalingon, taasan ang pisi sa pagsabot ug pasensiya. Lamas sa kinabuhi kining atong mga maagian nga lubak. Mao bitaw nga ako pinansiyal gyud ang labawng dako nga problema. Unsaon pag budget sa igo ra nga kita matag kinsena. Maayo na lang ang akong mga sakop sa panimalay kuntento kung unsay naa. Duha akong anak, babaye 15 ug 10 anyos. Akong Misis ang kita commission basis. Nalipay ako sa akong huna-huna kay tungod bisan sa ka simple sa among pamuyo himsog ug maka provide gihapon sa mga basic needs. Maayo kaayo ang GINOO kay tungod dunay mga higayon nga sa akong pagtoo wala nay makuot sa umaabot apan wala damha dunay muabot nga grasya. Kahibulongan kaayo ang pamaagi sa GINOO unpredictable gyod kaayo Siya. Basta salig lang kanunay sa GINOO nga mao ang akong ginahimo sa walay pagduha-duha. Anaa gyud Siya ug dili mubiya kanato.

Mapasalamaton,
Ben

* * * * * *

Dear Ben,

Ang mga pagsulay ug mga kalisdanan kabahin gyud kini sa atong kinabuhi. Tungod sa daghang mga leksyon nga nakat-onan niining mga kalisdanan, makaingon kita, oo, dato kita kay kini mahimo natong huna-hunaon nga mga bahandi nga atong magamit kung gikinahanglan. Makat-on kita sa papugong sa kaugalingon, pagsabot, pagpasensiya, pagpailob, pagpaubos… kung malampasan nato ang mga kalisdanan.

Sa tinuod, husto ka, ang mga pagsulay ug kalisdanan mga lamas sa kinabuhi aron mamahimo kini nga mahagiton, mabulokon (colorful), ug labaw sa tanan, makahuluganon. Busa, ayaw itugot nga ang imong mga pag-antos ug mga kasakit mawala lang ang bili niini pinaagi sa pagbagulbol o walay pailob. Apan ihalad kining tanan ngadto sa Ginoo sa imong mga pag-ampo alang sa kapasayloan sa imong mga sala ug mga sala sa kalibutan, alang sa katuyoan sa Simbahan ug sa atong Santo Papa, ug uban pang mga katuyoan. Kining matang sa mga panglantaw ug kinaiya, mga pagsulay sa kinabuhi, dili angay likayan apan dawaton kini tungod kay nahibalo ka nga naay hinungdan kung ngano imong nasinati ang tanan.

Ang Diyos usa ka Diyos sa mga surpresa. Mahimong wala ka makabantay niini apan gibubo na diay Niya ang mga panalangin nga wala nimo damha, ug usahay sukwahi og labaw pa kini sa imong mga gipanghangyo! Ingon niini ang pagkamapuanguron sa atong Diyos. Salig lang gyod Kaniya kay nasayod Siya unsay labing maayo alang kanimo. Salig lang sa Iyang Diosnong Paigo. Hinumdomi ang pag-ampo nga gitudlo kanato ni Hesukristo… “Ihatag kanamo karong adlawa ang among kalan-on sa matag-adlaw…” Timan-i nga ang gihangyo nga kalan-on dili alang sa tibuok bulan kon dili kada adlaw! Ug dinhi nahimutang ang atong pagsalig sa Iyang pag-atiman ug probidensya!

Ang Ginoo dili mohatag kanato og mga pagsulay nga dili nato mabuntog. Hinumdomi ang Iyang kasigurohan nga ang Iyang grasya igo na aron kita makaagi sa mga pagsulay ug makabangon uban ang mas lig-on nga pagtuo ug kalig-on taliwala sa mga kalisdanan.

Sa kasamtangan, magpasalamat ka sa mga panalangin sa maayong panglawas ug kaayohan sa mga sakop sa imong pamilya. Kini labaw pa sa imong mapangayo tungod kay ang maayong panglawas mahinungdanong bahandi sa ngatanan. Padayon sa simple ninyong kinabuhi samtang inyong gitino ang inyong mga panginahanglan ug mga gusto lamang. Bisan unsa nga mga krus nga inyong masugatan sa kinabuhi, dad-a kini uban sa gugma ug pailub. Panaw ug paghiusa sa inyong kaugalingon uban kang Hesukristo. Ug sama sa usa ka sikat nga kanta, pagtuo lang nga kung naa ka sa labing ubos nga mga gutlo sa imong kinabuhi, diin adunay usa ra ka hugpong sa mga tunob, mao na nga Siya nagdala o nagkugos kanimo.

God bless you more.
Ate Emz