Ultimo Lang Ako

Dear Ate Emz,

A blessed day to all. Hinaot anaa kita sa maayong kahimtang ug panglawas tanan.

Ulitawo pa ako ug sa akong pangidaron nga 35 yrs. medyo taas-taas na kumpara sa uban nga duna nay kaugalingong pamilya. Wala ko na isipa ang pagkinabuhing dunay hinigugma kay mauwaw ako sa akong kahimtang nga walay ikapasigarbo KAY ULTIMO LANG AKO. Dunay simpleng kinabuhi ug kuntento na ako niini. Kaya lang makapangutana ako ug unsay akong dangatan sa umaabot kon mag-inusara ra ako sa kinabuhi. Walay asawa ug mga anak nga mu agak sa pag-abot sa panahon nga mu tiguwang na kaayo.

Sa pagka karon okay pa ang tanan pero dili ka kumpiyansahan kay basin unya dunay mga kakulian. Unta maayo ang mga panghitabo sa umaabot. Bisan na ug nag-inusara sayud man ako anaa si Hesukristo kanunay naga uban kanako. Apan dili ko malikayan ang kahadlok sa akong future.

Mapasalamaton,
Bayong

* * * * * *

Dear Bayong,

Salamat sa imong pagpaambit sa sitwasyon diin ikaw nakasinati og kabalaka sa umaabot. Dili gyud malikayan kini nga pagbati ilabi na kung ikaw ulitawo og kabalo ka nga paspas kaayo ang dagan sa panahon ug dili mapugngan ang imong edad nga motaas usab. Sa laing bahin, bisag daghan ang nag-ingon nga okay lang kini sa mga lalaki, naa gihapon ang gibati nga kabalaka.

Ang rason nga imong gilatad nagpasabot nga tungod sa imong kakuwang sa pagsalig sa kaugalingon, kini maoy nakababag kanimo sa pagpadayon sa imong love life. Nagtuo ka nga tungod ikaw ultimo lang, wala kay ikapasigarbo. Sa laing pagkasulti, murag ubos ra ang imong pagtan-aw sa imong kaugalingon, ug kini makapasubo kaayo.

Unsa kaha ang mahimong mga hinungdan niining imong ubos nga pagtan-aw sa imong kaugalingon? Basin kulang ka lang sa pagpamalandong kung unsa ang imong mga talento ug mga kahanas. Dugang pa niini basin kulang ka lang og mga kahigayonan aron madiskobre nimo ang imong maayong mga kinaiya. Hinumdomi nga kitang tanan naa gyod niini mao nga dili gyod ka makasulti nga wala kay ikapasigarbo. Ang imong gipahayag nga simple ra ang imong kinabuhi ug kuntento ka na niini, murag nagpasabot nga dili kaayo kusog ang imong kadasig aron mapalambo pa ang imong kinabuhi o naa kay mga ambisyon ug mga pangandoy nga gusto pa nimo makab-ot.

Nakapangutana ka kung unsa ang imong dangatan kung sa imong pagtiguwang mag-inusara ka lang ug walay asawa ug anak nga muagak kanimo. Sa pagkatinuod, kini nga pangutana mahimo na kini magsilbi nga springboard aron makaplano ka kung unsa ang gusto nimong mahitabo sa imong kinabuhi. Ihan-ay na kini ug ilista ang mga konkretong aksyon nga imong buhaton aron makab-ot kini. You just don’t let things happen but decide to make them happen. This will spare you from worrying because you are taking definite actions right now and you know where all these will be leading you.

Go out of your comfort zone and try new things. Dawata ang mga hagit sa kinabuhi, ayaw kahadlok sa mga pagsulay tungod kay kini ang mga oportunidad aron madiskubre nimo kung unsay imong mga kapasidad ug mga kahuyang. Mao kini ang paagi nga ikaw molambo, motubo ug sa kadugayan makaangkon ra og pagsalig sa imong kaugalingon.

Padayon sa pagkat-on ug pagtubo. Samtang buhi pa, kanunay adunay higayon aron makat-on ug makaangkon og bag-ong mga kahanas, aron mahimong mapauswag ang pagtamod sa kaugalingon. Ipasiugda ang pagtutok sa positibo kaysa mga negatibo nimong mga kinaiya. Busa, kini makatabang kanimo sa pag-ugmad ug positibo sab nga mga relasyon. Likayi ang pagkumpara sa imong kaugalingon sa uban tungod kay kini makapahimo kanimo nga dili malipayon.

Ang kaminyoon dili lamang ang direksyon sa kinabuhi. Kung pagbuot sa Ginoo nga ikaw magpabilin nga ulitawo, dili ka Niya pasagdan. Atimanon ka Niya pinaagi sa pagpadala sa mga tawo nga mosuporta kanimo sa imong panaw sa kinabuhi ug motabang Siya niadtong nagtabang sa ilang kaugalingon.

Pag-amuma og pag-ampo sa kinabuhi kay dinhi nimo masugatan ug masinati ang Ginoo nga kanunay magpadayag sa Iyang mensahe sa gugma ug pag-atiman kanimo. Duyog sa atong Mahal nga Inahan sa Kanunay’ng Panabang, hinaot mahimong labing hingpit ang imong pagsalig sa atong Ginoo.

Remember and be assured, you are precious and honored, God loves you, and He holds you on the palm of His hand. (Isaiah 43:4; 49:46).

Chin up, Bayong, anak ka sa Diyos! Kini ang una ug importante nimong ikapasigarbo!

God bless you more.
Ate Emz