Sa Dios Maggikan ang Katagbawan

Dear Ate Emz,

Ang tawag sa atong Ginoo dili nato usahay madunggan kay tungod naka focus kita sa ubang butang. Ang atong kaugalingong kabubut-on maoy atong kanunay ginasunod ug walay pagpakabana sa kung unsay pagbuot sa Dios Amahan.

Mahinumdoman ko kaniadto sa batan-on pa ako, mga higayon nga grabeng paningkamot makakwarta lang. Daghang raket ug halos walay saktong diskanso tungod sunod-sunod ang events. Medyo sakto ang kita apan nahibulong ako ug nganong dili man gihapon ko makaipon ug murag ipit gihapon sa mga panginahanglanon. Dili man ko maluho pero murag kulang pa gihapon ang akong income.

Kaniadto man gud basta na gani dunay raket, akong huna-huna maka income na sab ako. Nahikalimtan ko ang source niining tanan nga mao ang Ginoo. Naghatag sa mga grasya nga sa atong pagtoo gikan sa atoang paningkamot.

Yes, tinood kini apan pagboot gihapon ang tanan sa atong Dios Amahan. Niabot sa punto nga 180 degrees giusab ko ang akong kinaiya mahitungod niini ug tua nasayran ko ang rason. Lahi gyud diay kung nasubay ka sa saktong dalan. Sukad niadto akoa na nga gi offer ang tanan sa Dios Amahan. Nabati ko ang katagbawan ug wala nay ginakabalak-an.

Hinaot kining akong kasinatian makahatag og pagtulon-an sa uban nga ang tanan gikan gyud sa atong Ginoo ug dapat mahimong mapasalamaton kita.

Just Me,
Jocelyn

* * * * * *

Dear Jocelyn,

Nahinumdom ko sa usa sa akong paboritong mantra… BAWAT GISING, BLESSING. Ug uban niini, ang mga pagpasalamat sa atong Ginoo nga sa makausa pa nihatag og bag-ong adlaw aron masinati ang Iyang gugma ug pag-atiman. Busa, kung asa kita karon sa atong panaw sa kinabuhi, hinumdomi nga sa tanang panahon anaa ang Ginoo nga nagaatiman kanato, nasayod man kita Kaniya o wala. Ato lamang Siya giabog kon kita makasala.

Dili ko kalimot sa homiliya sa usa ka pari diin iyang gipaambit nga “ang kalipay sa kinabuhi mao ang mga hunghong sa Ginoo nga nagpahibalo kanato nga anaa Siya. Apan kung dili nato Siya madungog, Iyang gitugotan ang mga kasakit ug pag-antos nga atong masinati. Mao kini ang Iyang mga singgit nga nagpahibalo sa Iyang presensiya.” Busa, pinaagi niini, Iya kita gipaduol Kaniya kay murag wala kita nakadungog ug nakabantay nga naa lang Siya sa atong duol.

Uyon ko sa imong obserbasyon nga usahay dili ta makadungog sa tawag sa Ginoo tungod kay naka focus ta sa laing butang. Mao nga manguhit gyud Siya kanato… sama sa pagpanguhit niya kanimo. Sa unsang paagi? Sa imong mga pagbati nga kahaw-ang, ug murag naa gyud kulang bisan pa sa daw kapuno sa imong komportable nga kinabuhi. Daghan ka ug kwarta apan kung imong sutaon, naa lang gihapon og kulang. Ngano man? Tungod kay lahi ra ang imong ginapangandoy ug gisubay nga dalan.

Salamat sa Ginoo nga imong gihimo kanang 180 degrees nga kausaban o pagliko sa dalan nga imong gilaktan. Mao nga nakaamgo ka nga dinha lang nimo matagamtaman ang tinuod nga katagbawan sa kahaw-ang nga imong gibati. Husto ka, sa imong pag-usab, bisan unsa ang imong buhaton, ihalad tanan balik sa Ginoo kay Siya ang tinubdan sa tanan nga naa nimo, ug walay angay’ng ikabalaka.

Remember, you are gifted to give. Paghatag sa walay pag-ihap, ipaambit ang imong mga panalangin nga oras, talento ug bahandi kay kini mga timailhan sa imong kinabuhing mapasalamaton. Labaw sa tanan, buhata kini uban sa dakung gugma alang sa pagdayeg ug paghimaya sa atong Ginoo. Hinaot pa unta nga kining imong kasinatian makadasig gyud sa uban nga nanlimbasug pa sa pagpangita og kahulugan sa ilang adlaw-adlaw nga kinabuhi.

Lastly, may St. Teresa of Avila inspire and assure you with her words: “let nothing disturb you, let nothing frighten you, all things are passing away: God never changes. Patience obtains all things. Whoever has God lacks nothing. God alone suffices.”

God bless you more.
Ate Emz