Paglaom, Gugma ug Pagtoo diha kang Kristo

Ika-19 nga Domingo sa Ordinaryong Tuig (Aug. 7, 2022)
Wis 18:6-9 / Ps 33:1, 12, 18-19, 20-22 / Heb 11:1-2, 8-19 / Lk 12:32-48

Bisan kinsa nga adunay paglaom nagkinabuhi nga lahi; ang naglaom gihatagan ug gasa sa bag-ong kinabuhi” (Encyclical Spe Salvi, no. 2). Kining maong kamatuoran gipamatud-an ni Abraham diha sa atong ikaduhang pagbasa karong Dominggoha, tungod kay siya naglaom gayod sa mga saad sa Dios ngadto kaniya. Ang kangitngit sa pultahan sa panahon sa umaabot, karon nalamdagan ug naablihan tungod sa iyang mahimayaong paglaom. Gani, diha sa atong Ebanghelyo ang atong Ginoong Hesukristo nag-ingon man nga “Ayaw na kahadlok, gamay nga panahon, kay gikahimut-an sa inyong Amahan paghatag kaninyo sa Gingharian” (Lk 12:32), Ang atong kasingkasing gibuksan aron sa paglaom nga maoy modan-ag ug mohatag sa kinabuhi sa matuod nga kalipay.

Sa miaging Dominggo ang atong Ginoo nagtudlo kanato sa pagsalig gayod sa mga hatag sa atong langitnong Amahan ug dili lamang nga mapuno kita sa mga materyal nga mga butang sa kalibutan, apan kita gipahinumdoman sa kanunay sa pagpangandoy sa mga butang nga langitnon diin walay mga kawatan nga makakuha niini ug walay mga anunugba nga makakutkot niini. Kita karon gihagit sa pagkamabinantayon sa kanunay tungod kay wala kita masayod kon kanus-a mobalik ang Anak sa Tawo ug sa kanunay atong andamon ang atong kaugalingon sa pagsugat sa atong Ginoo pinaagi sa atong pagkamatuohon, pagkamalaumon, ug pagkamahigugmaon.

Pinaagi sa atong mga buhat ug linihokan kita mahimong ehemplo ngadto sa uban pinaagi sa pagpuyo sa inadlaw-adlaw nga pagkinabuhi subay sa kabubot-on sa Dios. Ang Ginoo nag-awhag kanato nga iyang mga sumusunod, nga puy-an nato sa kanunay diha sa atong kinahiladman, ug nga mahisama kita sa usa ka sulugoon nga diha sa sambingay kinsa maigmatong nagtukaw ug nagpaabot sa paghiuli sa iyang agalon gikan sa kombira. Busa kinahanglan kitang magbantay, mag-ampo ug magbuhat ug maayo. Aron inig abot sa panahon nga ang atong Ginoo makighimamat na kanato, kita andam sa pagsugat Kaniya.

Sa katapusan, ang atong paglaom, paghigugma ug pagtoo maoy mag-awhag kanato sa pagbuhat sa kabubut-on sa Dios. Kining maong paglaom inubanan sa gugma ug pagtoo maghatod kanato sa Gingharian sa Dios nga giandam sa atong Ginoo. Kita nga mga piniyalan maghatag sa paglaom, gugma ug pagtoo ngadto sa uban, pinaagi sa usa ka pagdapit sa paggamit sa mga butang nga dili hinakog ug walay kauhaw sa pagpanag-iya, apan sumala sa lohika sa Dios, ang lohika sa konsiderasyon alang sa uban, ang lohika sa gugma. Sama sa gisulti ni Romano Guardini, “in the form of a relationship: beginning with God, in view of God.” (Bro. Soren Abellana)