Pag-Ampo Kanunay Ngadto sa Ginoo

Ika-17 nga Domingo sa Ordinaryong Tuig (July 24, 2022)
Gen 18:20-32 / Ps 138:1-2, 2-3, 6-7, 7-8 / Col 2:12-14 / Lk 11:1-13

Unsaon nato pag-ampo ngadto sa Ginoo? Gihulagway ni Santa Teresita sa Batang Hesus ang pag-ampo usa ka “pagdagsang sa kasingkasing”. Kini labaw pa sa mga pulong nga anaa sa atong mga huna-huna. Kini mao ang tinuoray nga pagpaambit ngadto sa Ginoo sa atong mga pangandoy, kalipay, kasubo, ug mga pagbati. Kini mao ang klase sa pag-ampo nga gitudlo ni Hesus sa Iyang mga disipulo sa Ebanghelyo ni San Lukas 11:1-13 nga adunay bersyon sa “Amahan Namo”.

Si Hesus nagtudlo kanato sa pagtawag sa Ginoo og “Amahan”, usa ka termino nga nagpakita kung unsa nato kasuod ang Ginoo. Gipahinumdoman usab kita sa kabalaan sa Ginoo. Gisultihan usab kita ni Hesus bahin sa Iyang Gingharian ug sa Iyang kabubut-on alang kanato. Gihisgotan usab nato ang “atong kalan-on sa matag adlaw”, nga nagpasabot sa mga panginahanglan sa atong kinabuhi. Mangayo usab kita ug pasaylo sa atong mga sala aron kaloy-an kita sa atong Amahan ug ato sab ipakita ang atong pagpasaylo ug kaluoy sa mga tawo nga nakasala kanato diin atong gihangyo ang presensya sa Ginoo sa mga panahon nga anaa kita sa mga pagsulay.

Gisultihan usab kita ni Hesus nga magpadayon sa pag-ampo. Ngano man? Ang pag-ampo wala nagpasabot nga atong “bag-uhon ang hunahuna sa Dios” kondili aron mahiusa kita Kaniya. Ang dili pag-undang sa pag-ampo maoy nagapadayon aron abri ang linya sa komunikasyon, nga nagtugot sa Ginoo aron Siya makigsulti kanato sa atong mga kasing-kasing. Makatabang kini kanato nga makita ang mga butang sa lahi nga panglantaw, o makatabang kanato sa bag-ong direksyon sa atong kinabuhi, o makapahumok sa atong mga kasingkasing. O tingali kinahanglan lang nato magpailub.

Ang pag-ampo gituyo aron matangtang ang pagkasirado sa atong panghunahuna. Nagatawag kita sa Ginoo nga duol kanato aron ato Siyang matawag nga Amahan bisan pa nga lahi kaayo Siya kanato. Ang Ginoo usa ka misteryo alang kanato, apan pinaagi sa pag-ampo kita makabaton ug pagsabot sa Iyang kinaiya. Ug unya makakat-on kita sa pagsalig Kaniya sa tanan natong gikinahanglan.

Paglahutay sa pag-ampo! Padayon sa pagpangayo sa Ginoo sa tanan nimong gikinahanglan! Ang Dios kanunay naminaw kanato ug andam Siya motubag sa atong mga pag-ampo. (Bro. Ignatius Gonzales, CFA)