Mary Help Of Christians Dunay Bag-Ong Parish Priest

Gi-instalar isip bag-ong kura paroko si Rev. Fr. John L. Cardinal, SDB sa Mary Help of Christians Dacudao Calinan niadtong Hunyo 26, 2022 adlawng Dominggo sulod sa misa nga gipangulohan ni Arsobispo Romulo G. Valles, D.D. Gipahitabo usab ang pagpresenta sa bag-ong parochial vicar nga mao si Rev. Fr. Ariel M. Arias usa gihapon ka pari gikan sa Salesians of Don Bosco kon SDB.

Gipasibaw ni Abp. Valles ang iyang dakong kalipay sa pag-imbitar kaniya sa mga SDB nga mangulo niining espesyal nga misa alang sa installation ug presentation. Iya usab gipasalamatan si Fr. Marcelino Benabaye sa iyang 8 ka tuig nga pagpangalagad sa parokya. Diha sa iyang pamalandong iyang gipunting ang hinungdan sa maong mga pagbalhin balhin ug tahas sa mga kaparian. Gipasabot niya nga ang mga kaparian adunay nagkadaiyang mga gasa nga angay masinati sa tanan ug kung dili sila matagaan diha sa laing tahas sa laing dapit, dili usab kini mapaambit ngadto sa uban ilabi na sa mga nanginahanglan.

Ang maong pagbasa sa mga sulat sa pagpili o appointment letter alang nila Fr. John ug Fr. Ariel, gibasa sa Chancellor sa Arkidayosis nga mao si Msgr. Jaime Gamboa. Ang mga parokyano namalakpak isip mainitong pagdawat sa duha ka mga piniyalan sa parokya.

Human sa mga piniyalan ang mga myembro na sab sa parokya ang gipresenta diha kanila alang sa pag-ilaila ug makahuloganong pagbinay-loay ug suporta sa usag-usa. Kini mao ang han-ay sa mga grupo:

Parish Pastoral Council
GKK Servant Leaders
Parish Staff and Household Members

Human niining mga pagpresentar, gipahinumdoman ni Abp. Valles si Padre John sa pagpadayon sa iyang pagkamahigugmaon, pagkamaaghop nga magbalantay ug sa pagkamaigmat nga magtutudlo sa mga katawhan aron sila iyang madala ngadto kang Kristo nga maoy maglig-on kaniya sa tanang mga bulohaton.

Si Father John nga nagsaulog usab sa iyang ika-64 nga adlawng natawhan nalipay sa iyang bag-ong tahas isip kura paroko tungod usa kini sa iyang mga dugay nang gihandom sukad siya naordinahan ug human sa 34 ka tuig natuman na gayod kini. Dako ang iyang pasalamat sa atong arsobispo sa mainitong pagdawat ug bisan tuod dili niya kini first time nga niabot dinhi sa Davao, dili gihapon kini sama sa iyang tahas sa kaniadto. Usa kini ka dakong pribileheyo nga mahimong kura ug para kaniya usa sa iyang mga gasa nga mapaambit sa mga parokyano sa Mary Help of Christians ang iyang kasing-kasing nga giniyahan sa Dios, magmahigugmaon sa tanang katawhan.