Kakulangan ug Kahuyang

Si San Pedro ug San Pablo isip mga panig-ingnan natong mga yanong tawo, naghulagway sa katingalahang gahom sa atong Dios diha sa pagbag-o niya sa ilang kasingkasing. Walay laing butang sa kalibutan nga mamahimong makapabag-o sa kinaiya sa tawo padulong sa kahingpit. Dili ang panginahanglan nga lawasnon o kalibotanon, dili kwarta, dili kalisod kon dili GUGMA.

Ang dakong gugma ni Hesus kung ato gayong matugkad, kita makabati una diha sa kaulaw, kaulaw tungod dili kita angay ug takos sa iyang dakong gugma. Usahay tungod niining atong kaulaw magpalayo kita ug mas mupabor sa kangitngit. Apan atong panalaminan kining atong mga santos nga sila San Pedro ug San Pablo nga gani dagko kaayo ug mga salaod nga nabuhat.

Kita usab niining makabag-ong panahon, kabahin niining hagit sa pagbag-o pinaagi sa pagkaamgo sa dakong gugma sa Dios. Kita mga sinaligang piniyalan sa katilingban, sa atong kinaiyahan. Busa, maningkamot kita nga bisan sa atong kakulangan ug kahuyang, sa kalisod sa dalan ug sa krus nga gipas-an kita, mahingpit ug dili nato kalimtan nga si Hesus miari alang sa atong kaluwasan.