Kabatan-Onan sa Parokya Santiago Apostol Bunawan Nagpasundayag Sa Tagsa-Tagsa Nilang Mga Talento

Gipahigayon ang Youth Night 2022 niadtong July 17, 2022 sa Barangay Bunawan Gymnasium diin daghang mga aktibong kabatan-onan ang misalmot niining pasundayag nga sakop sa Santiago Apostol Bunawan. Ang maong aktibidad gipahigayon alang sa ika-60th Parochial Fiesta (Diamond Jubilee) sa maong parokya. Duha ka tuig na ang milabay nga wala napahigayon ang maong pasundayag human nagkapandemya diri sa nasud. Busa karon makita gayod sa dagway sa mga kabatan-onan nga malipayon ug madasigon silang mihalad sa ilang mga talento diin makapahimuot gayod sa Ginoo. Tungod sa maong kalihukan nahiusa ug migahin ang tanang mga GKK Leaders sa matag sona nga sakop niining parokya sa ilang panahon sa pagduyog ug pagsuporta sa ilang mga kabatan-onan.

Mapasigarbuhon nga mihatag sa iyang mensahe ug pasalamat si Reberendo Padre Rolando O. Mandreza sa tanang nakiglambigit ug labi na usab sa mga aktibong kabatan-onan nga mapadayunon gihapon nga nanerbisyo sa ilang mga tagsa-tagsa ka (GKK) Gagmayng Kristohanong Katilingban bisan pa man sa pandemya.

Malampuson ug malipayong natapos ang maong kalihokan sa kabatan-onan sa Santiago Apostol Bunawan pinaagi sa katapusang panalangin nga gihatag ni Fr. Rolando Mandreza. Tumong niining maong aktibidad nga balikon ug barog ang mga kabatan-onan luyo sa naagian nga COVID surge sa nasud. (Apple Jean C. Cabatuan | SJAP SocCom)