Ang Makabuluhanong Bag-ong Panaad sa 36 ka Extraordinary Ministers sa St. James Apostle Parish

Nanumpa sa ilang bag-ong panaad ang 36 ka Extraodinary Ministers sa St. James Apostle Parish kadtong Hunyo 19, 2022, diin gisugdan sa pagsaulog sa Santos nga Misa, nga gipanguluhan ni Rev. Father Rolando O. Mandreza, DCD.

Nagsaulog usab ang tibuok simbahan sa bililhong gasa sa kaluwasan, ang Solemnidad sa lawas ug dugo ni Kristo kon “Corpus Christi”. Gipasidunggan usab ang pagsaulog sa selebrasyon sa Father’s Day diin gisugdan ni Fr. Rolando ang iyang pamulong sa pagtimbaya sa mga amahan ilabina sa mga buotang amahan nga ang gugma sama sa pagpangga sa Dios Amahan sa Iyang mga anak. Sumala sa pamulong ni Fr. Rolando mahitungod sa Ebanghelyo ni San Lucas 9:11-17, diin kitang mga tawo, ilabina ang mga Pilipino adunay kinaiya sa pagpaambit o ang pagkahilig sa pagbahin sa kung unsay naa. Kini usa ka timaan sa tawo nga yukaristikanhon.

“Naanad ta anang pag-inambitay, kini nahimo na natong kulturang mga tawo, ug mao kini implikasyon sa atong makanunayon nga pagapil sa misa,” gidungagan kini ni Fr. sa pag ingnon, “Everytime we attend the Holy Mass, ang matag usa kanato nahimong yukaristikanhon, nahimo kitang lawas sama sa lawas ni Kristo nga gipaambit ngadto sa uban.”

Kining mga pulonga nagpahinumdom kanatong mga tawo nga sa matag dawat nato niining pan nga maghatag ug kinabuhi, manghinaot kita nga mahisama ta ni Kristo. Pagpahinumdom usab kini nga ang hagit sa pagpaambit ginagmay man o dinagko, kung kini makanunayon makahatag kinig kinabuhi ngadto sa uban. Gipunting diha sa pamalandong nga ang Santos nga Misa maoy timaan sa pagkamanggihatagon ug dakong gugma sa atong Ginoo, diin Iyang gihatag iyang lawas ug dugo aron makahatag ug kinabuhi. Pinaagi sa regular nga pag-apil sa Santos nga Misa mahisama kita sa Ginoo.

Ang maong makabuluhanong pulong ni Fr. Rolando, naghatag ug kadasig kanatong mga tawo, ilabina ang mga Extraordinary Ministers nga nanumpa sa ilang bag-ong panaad ug ang hagit sa pagpaambit ngadto sa uban. Dinhi usab gibasbasan ang ilang mga medalya timaan sa ilang makanunayong pag alagad ug pag serbisyo sa Ginoo. Apan sila usab mga amahan nga nagserbisyo ug nangalagad, gipanalanginan sila nga mapaambit ang maong pag-alagad ngadto sa ilang pamilya ug sa uban. Diha sa katapusan, Gitapos ang Santos nga misa nga puno sa kadasig ug kalipay. DALAYGON ANG BUHING DIYOS. (Elona Jane W. Ricafort)