Usa ka GKK hingpit nang gi-turn over sa San Roque Parish, Malabog

Niadtong Mayo 23 adlawng Huwebes, hingpit nang gi-turn over ni Rev. Fr. Maximo Sarno ang GKK San Isidro Labrador nga kaniadto nasakop sa parokya sa Calinan ug sa pagkakaron sakop na sa parokya ni Sr. San Roque sa Malabog. Kini nahimutang sa Purok Pangyan, Brgy. Tamugan, Marilog Dist., Davao City ug niadtong Mayo 25 gisaulog ang iyang ika-49 ka tuig nga kapistahan nga gipangulohan sa among kura paroko nga si Rev. Fr. Arnold Balaquinto uban sa tema: “Sr. San Isidro, sumbanan sa dakong pagtoo og pagsalig ngadto sa Dios”.

Daghan nga mga bisitang pangulo gikan sa nagkalain-laing GKK nga sakop sa matag sona sa parokya sa San Roque ug ang bag-ong GKK nahisakop na sa sona 6 uban sa coordinator nga si Mr. Vincent Gequilan ug siya mapasalamaton sa tanang pangulo nga mitambong. Dugang niya nga maningkamot silang tabangan ang matag GKK kon duna man silay mga panginahanglan.

Gipaila-ila pod ni Fr. Arnold ang mga pangulo sa laing mga GKK nga iyang ginsakpan, tanang coordinator sa mga sona, coordinator sa tanang ministriya sa parokya ug ang mga dinapit pa nga mga bisita gikan sa nagkalain-laing parokya. Nihatag pod og mensahe ang usa ka PSK nga si Mr. Menardo Bantawig ug nagpasalamat siya kay Fr. Arnold ug sa tanang mga kaubanan nga pangulo sa matag GKK, ug namulong usab siya nga bisan asa kuno siya ibutang basta magmasaligon padayon siya sa pagpangalagad ug pagdasig sa mga kaubanang miyembro. Sulod sa maong misa, adunay 5 ka mga bata nga nakadawat sa sakramento sa bunyag.

Tuod man bisan asa mapailawom ang usa ka katilingban, mulambo gihapon kini tungod sa grasya sa Dios. (Noralyn Largo and Joms Saguban | GKK Soccom)